Lungleiah traffic leh NCD inzirtir

Healthy Lunglei District chuan nimin khan Saikuti Hall, Lungleiah Lunglei Auto Rickshaw Owners' Association member-te tan traffic dan leh natna inkai chhawn theih loh - non-communicable diseases (NCD) chungchang inzirtirna an buatsaih a, Lunglei Municipal Council (LMC) vice chairman K Lalrinawma'n a hmanpui.

Awareness campaign-ah hian auto-rickshaw neitu/khalhtu mi 250 chuang an tel a; Lunglei Civil Hospital-a doctor Dr Vanlallawma Khiangte-in NCD chungchang a hrilhfiah a, Lunglei Police Station-a traffic in-charge Lalṭhabuanga'n traffic rules chungchang a zirtir. Civil Hospital-a thawkte'n an hriselna dinhmun an enfiah bawk.

LMC Vice Chairman chuan, Lungleia lirthei tam ber chu auto-rickshaw a nih avangin rickshaw khalhtute an chêt mawi chuan Lunglei traffic-in a ṭhat phah tuir thu a sawi a; Lungleiin traffic lamah hma a sawn zel theih nan thuneitute nen thawhhona ṭha kalpui zel turin lirthei khalhtute a chah.

LMC-in faina leh thianghlimna a ngai pawimawh tih sawiin K Lalrinawma chuan, auto-rickshaw enkawltute chu an lirthei leh an dinna hmunte faina taka enkawl turin a chah a; nungchang mawi pu tur leh ruihhlo laka fihlim a, an hriselnate vawng uluk turin a fuih bawk.