Saitualah Sampoornata Abhiyan hawng

Rural Development minister Prof. Lalnilawma chuan nimin khan Saitual College auditorium-ah Ngopa RD Block (Aspirational Block) tan Sampoornata Abhiyan a hawng.

Prof. Lalnilawma chuan, Aspirational Block atana Ngopa RD Block thlan a ni chu hmasawnna sum tam tak luhna remchang a nihna zâwnah a lawmawm rualin, hmasawnna tluantling a awm theih nan nasa zawka hmalak a ṭul thu a sawi a, "Inpekna thûk zawk nen thawhhona ṭha neih a ṭul. Sampoornata Abhiyan tihlawhtling turin line department-te'n thawhhona leh inlungrualna ṭha an neih phawt chuan an hmachhawpte a hlawhtlin ngei ka ring," a ti.

Sampoornata Abhiyan hnuaiah hian thla thum chhungin Ngopa RD Block-ah hian tehna hrang hrang tihhlawhling turin hmalak a ni ang. Hriselna lam kaihhnawih, nu nau pai hriselna endik, raipuarin chaw ṭha a dawn dan, kum 30 chin chung lamte blood pressure leh zunthlum endik, Agriculture department hnuaia soil health card siam leh self help group-te'n ṭanpuina an dawn dante chu tehna tur tlangpui a ni.