Casual teacher lâk vangin lawm

ZPM party chuan thuchhuah siamin, School Education department-in Mizoram hmun hrang hranga zirtirtu indaih lohna hriaa tun hnaia casual teacher ṭhahnem tak a la thar chu lawmawm an tih thu an tarlang a, "Kan ramin zirnaah nasa taka hma a sawn ngei kan beisei," an ti.

School Education minister Dr Vanlalthlana hmalaknaa casual teacher ṭhahnem tak dik tak leh uluk taka lak a ni chu lawmawm an tih thu sawiin ZPM chuan, "High school, middle school leh primary school-a casual teacher lak thar zawng zawngte ZPM party chuan kan lawmpui," an ti a; zirtirtu atana lak tharte chu Mizoram zirnain bung thar a kai ngei theih nan ram tan ṭhahnemngai taka thawk tura an beisei thu an tarlang.

ZPM chuan, "Mizoram chu India ram pumah literacy rate-ah sang viau mah se, quality education chawisan lamah nasa zawka ṭan kan lâk a ngai hle. Zirtir dan kalphung (teaching method) te, curriculum leh syllabus thlengin sorkarin a ṭul dan ang zelin ennawn ṭhin se kan duh," an ti.