KHAWTHLIR

MBSE-in result tichhuak dawn

MBSE chuan vawiin chawhnu dar 12:30 hian HSLC leh HSSLC Compartmental & Improvement Examinations, 2024 result a tichhuak dawn. Result hi Aizawl leh Lungleia MBSE office bakah, www.mbse.edu.in leh www.mbseonline.com ahte en theih a ni ang.

CM chhuang

ZPM Ṭhalai chuan thuchhuah siamin, July 8, 2024-a Delhi-a Taiwan Expo-ah chief minister Lalduhoma khuallian a ni chu ropui an tih thu leh an chhuan thu an tarlang a, "Mizo ṭhalai tam takin rahbi thar kan chuankai phah ngei kan duhin kan beisei a ni," an ti.

Mizo hnam lâm intihsiak sawiho

Mizo Cultural Organisation hotute chuan nimin khan Tourism minister Lalrinpuii a pisaah an kawm a, zirna-in puala Mizo hnam lâm intihsiakna huaihawt dan tur an sawipui. Hnam lâm intihsiakna chu district-ah bul ṭanna siam a, Aizawlah a tâwp khârna siam ni se, an ti a; mumal zawka la ruahman leh atan an dah a ni.

Bawrhsapin leimin enfiah

Lawngtlai DC Cheemala Siva Gopal Reddy chuan nimin khan Kaladan Multi Modal Transit Transport Project kawngpuia leimin leh Lawngtlai SP pisa bula leminin in pakhat a hnâwlte a hmunah a enfiah. Bawrhsap chuan, chhiatna tuartute a tawrhpui thu sawiin, leiminin harsatna a thlenah chak taka hmalak a nih tur thu a sawi a; chhiatrupna thleng.

Lunglei DC thar

Lunglei bawrhsap thar R Lalṭhazuala chuan nimin khan a hna zawmin Lunglei DC pisa a luah ṭan. R Lalṭhazuala hian bawrhsap kalchhuak Ramdinliani a thlak a ni.

Chhawmdawlna pe

Tun hnaia ruahsur nasain khuarel chhiatna a thlen avanga Chhuanthar Tlangnuam, Baktawnga mahni in chhuahsantu chhungkaw pasarih hnenah Serchhip District Disaster Management Authority chuan July 8, Thawhṭanni khan State Disaster Response Fund aṭangin chhawmdawlna (gratuitous relief) sum an hlan.