Horticulture College lungphùm phúm

Union Agriculture and Farmer Welfare minister Radha Mohan Singh chuan, June 18, 2016 khan Selesiha College of Veterinary Sciences & Animal Husbandry-ah Mizorama Horticulture College tur lungphùm a phúm. Horticulture College hi Thenzawla din tur a ni a, a hmunhma peih a nih hma chuan Vety College-ah hian class kalpui rih tur a ni.

Radha Mohan Singh chuan, Mizoramin horticulture lamah theihna a neih ṭhat thu sawiin, "In theihna neihte ṭangkai zawka hman a nih theih nan Horticulture College kan din a, hei hi hmang ṭangkai turin theihtawp chhuah ang che u. Mizoramah huan thlai (horticulture crop) chîn theihna ram hectare 11,50,000 a awm laiin, hectare 1,10,000 chauh hman ṭangkai a ni a, ṭan lak a ngai hle," a ti.

Narendra Modi kaihhruai sokar hnuaiah India ramin hma a sawn nia sawiin Union Agriculture Minister chuan, "India-in tihdang-lam a ni a, a ṭha zawngin kan ram a in-thlak-thleng mek a ni," a ti a; sorkar laipuiin scheme hrang hrang a duante chu mipuiin chhawr ṭangkaiin hma an sawn phah niin a sawi.

Horticulture College hawn-naah Union Minister chuan, tun atanga rei lo têah Central Agriculture University, Selesihah Vocational Training Centre leh Multi Technical Training Centre-te hawn thuai a nih tur thu a puang bawk.

Agriculture minister R Lal-zirliana leh Horticulture minister PC Lalthanliana te pawhin thu an sawi a; Thenzawla Horticulture College building sak tur chu hmanhmawh taka sak ni se an duh thu Union Minister hnenah an thlen a ni.

Horticulture College hi July 15, 2016 aṭangin College of Veterinary Sciences & Animal Husbandry-ah ṭan a ni dawn a, seat 20 awmin, seat pali chu Mizoram quota a ni ang.

Union Agriculture minister Radha Mohan Singh hian nimin khan Mizoram a chhuahsan.