Ayyengar Committee chhinchhiah danin Mizoramah hnam hnufual 12 an awm

National Commission for De-Notified Nomadic and Semi-Nomadic Tribes (NCDNT) member secretary HK Das chuan, zan khat riakin Mizoram a rawn tlawh a; nimin khan State Guest House-ah Social Welfare department hotute nen inkâwmin, Mizoramah hnam tênau leh hnufual 12 an awm thu a sawi.

HK Das sawi danin, NCDNT hi sorkar laipuiin Ministry of Social Justice and Empowerment hnuaiah India ram chhunga hnam tênau chênna hmun nghet nei loa in sawn reng ṭhinte hmasawnna tur ngaihtuah tura a din a ni. Kumpinu (Britain) sorkarin Criminal Tribes Act, 1871 hmangin tribal hnam chi hrang hrangte chu hnam kawlhsen leh hnufual, pawikhawih chíng tiin a chhinchhiah.

India-in zalenna a hmuh hnu, kum 1952-ah sorkarin Parliament-ah dan thar The Habitual Offenders Act siamin, Criminal Tribes Act chu a
ṭhiat a; Ayyengar Committee dinin, chu committee chuan hnam hnufual chi hrang hrang 193 a chhinchhiah. Chung hnam tênaute chu tute nge, tunah khawiah nge an awm, eng dinhmunah nge an din, tihte hriat an tum a ni.

Ayyengar Committee chhinchhiah danin, Mizoramah hnam tenau leh hnam hnufual 12 an la awm thu sawiin HK Das chuan, chu'ng hnam hrang hrangte dinhmun chu zir chiang a, NCDNT-a thehlut turin Mizoram sorkar aiawhte chu a ngen a, "December 2017 ral hmaa sorkar laipuia report thehlut tura tih an nih avangin chak taka hma lak a ṭul," a ti.

Social Welfare secretary P Lal-chhuanga chuan, "NCDNT hi kan tan thil thar a ni a, tun dinhmunah chuan Mizoram chhungah semi-nomadic leh nomadic tribe an awm loa hriat a ni. Hnam tênau leh awmna kilkhawr deuhte pawhin family ration card an nei vek a ni," a ti a; theihtawp chhuaha NCDNT an ṭawiawm tur thu a sawi.

NCDNT Member Secretary hian Inrinni zan khan Governor Lt.Gen. Nir-bhay Sharma a kâwm bawk a; Mizorama cheng hnam ṭhenkhat chungchang hriat chian an duh thu leh state sorkar puihna an mamawh thu a hrilh.