KHAWTHLIR

Thisen pe

Model Veng Branch KṬP chuan, an din champha pualin Inrinni khan Aizawl Civil Hospital tan thisen unit 56 an pe a, a petute mipa 51 leh hmeichhia panga an ni. Aizawl Venglai Branch KṬP pawhin Aizawl Civil Hospital-ah unit 32 an pe a, a petute mipa 31 leh hmeichhia pakhat an ni. Lunglei Seventhday Adventist
ṭhalaite pawhin Lunglei Civil Hospital-ah unit 21 an pe bawk.

Rualbanlote Ni

Presbyterian Kohhran chuan nimin khan Rual-banlote Ni an hmang. He ni pual hian chawhnu leh zan inkhawmah hun hman a ni a, zan lam inkhawm thupui chu 'Isua - Rualbanlote hmangaihtu' tih a ni. Zan inkhawma thawhlawm lakkhawm chu rualbanlote puala dah a nih bakah, tualchhung kohhran ṭhenkhat chuan chawhma inkhawm
aṭangin biak-in kawtah rualbanlote pualin báwm an dawh.

Water cooler pe

Jeje Lalpekhlua chuan Hnahthial damdawi-in tan tui tihthianghlimna leh dah vawhna (water cooler) Rs. 68,000 man a hlan. A hmain oxygen concentrator a lo hlan tawh a; Hnahthial Zone Football Association chhunga naupang 50 tan summer camp a buatsaihsak dawn bawk a ni.

Relief Sunday

Mizoram Baptist Kohhran chuan nimin khan Relief Sunday an hmang a, biak-in tinah chawhma inkhawmah hun hman niin, thupui chu, 'Thil tih ṭhat leh thilphal' tih a ni.

Larsapin tlawh

Governor Lt. Gen Nirbhay Sharma chuan, Inrinni khan Falkawna Mizo Typical Village a tlawh a, he hmun hi tun hma lama Mizo nunphung leh ziarang pho langtu ṭha tak a nih thu a sawi.

Mei zu man

Lawngtlai District Anti-Tobacco Squad-te chuan, Inrinni zing khan Lawngtlai Bazarah squad drive an nei a, phal lohna hmuna mei zu mi 28 manin, COTPA Section 21-na hmangin an hrem.

Lusun khawhar

K Thangdailova (72) f/o Judy Lalropari (Vang-laini News Reporter), Champhai Vengthlang chu nimin tlai dar 4:00 vel khan stroke avangin a thi a, vawiinah an vuiliam a ni ang.