SHDC Cell Office lungphùm phúm

Chief minister Lal Thanhawla chuan, June 17, 2016 tlai khan New Secretariat Complex-ah Sinlung Hills Development Council (SHDC) Cell Office sakna tur lungphùm a phúm. CM chuan, "SHDC hi chi lâk bingna atana siam leh ruahman a ni lo" a ti.

Lal Thanhawla chuan, SHDC chu chi lâk bingna atana siam a ni lo a, hmasawnna a tlak rual a, hnufual bik awm loa pheikhai rual taka Mizoram leh Mizote'n hmasawnna kawng an zawh tlan theih nana ruahman a nih thu a sawi a, "Chutiang tura kan dawnsawn a pawimawh hle a ni," a ti a; Zo hnahthlak hmun hrang hranga awmte'n Mizoram hi Zo fate Jerusalem a ni tih an pawm theih nana ruahmanna péng pakhat a ni tih hriat a pawimawh thu a sawi.

SHDC chu Zoram pum chhun êngtu ni tura a duhsak thu sawiin, CM Hawla chuan, Zo fate tan malsawmna, inpumkhatna leh hmasawnna thlenna kawngah beiseina sang tak a neih thu a sawi a, "Inla hrang tur kan awm lo. Mizote hi sakhaw lian tak tak pathumin min hualbet chungin, Thlarau Thinghlimin min zawng chhuak a, hei hi Pathianin awmze neiin Zo fate hi a hman duh vang a ni. Inpumkhat a, khawvel hmun tina thil siam tinrengte hnenah Chanchin Ṭha hril tura koh chhuah hnam kan ni tih kan hriat leh kan chian a ngai," a ti.

Chief Minister chuan, Myanmar-a Zo fate sorkar nghenchhan loa kawng hrang hranga anmahni an intodelh a hmu chu ropui a tih thu leh, khawchhak leh Manipur lama awm Zo hnahthlakte aṭangin mahni intodelhna kawngah leh sorkar nghenchhan loa khawsak zirnaah Mizorama awmte'n zir tur an neih thu a sawi bawk.

SHDC Cell Office lungphùm phùmna inkhawmnaah hian Home minister R Lalzirliana, Finance minister Lalsawta, Govt. deputy chief whip leh Tuivawl bialtu MLA RL Pianmawia, parliamentary secretary K Lalrinthanga te an tel.

SHDC chairman Hmingchungnunga chuan, SHDC Cell Office sakna atan Mizoram sorkarin cheng nuai 40 a pek thu a sawi.