State Referral Hospital-a hna thawh MNF ṭhalaite'n lungawithlak loh an ti

MNF ṭhalaite chuan, State Referral Hospital, Falkawna KMV Project-in hna an thawh mekte a hmunah an enfiah tih sawiin, an hmanraw hman leh an hnathawh dante lungawithlak loh an tih thu an tarlang.

MNYF thuchhuah chuan, State Referral Hospital building chhâwng hnuai sak meka an leirawhchan hmante chu a no avangin in sakna atan a hman tlak loh niin a tarlang a, "PWD-te phei chuan hman an phal hauh loh tur 'C' grade ang an hmang. Damdawi-in chhung hnuai bang an pin meka an leirawhchan hman en hian lungawithlak loh kan ti. Brick pum tluan vek hmanna turah a bungte remin an plaster hnan a, an zût mam leh mai mai a ni," a ti.

MNF ṭhalaite tarlan danin, State Referral Hospital tihchangtlun nan SCA aṭangin cheng vbc. 18.88 hmuh a ni a, hna thawk turin KMV Project Ltd. chu tender chhuah loa hna pek an ni. MNYF chuan, "Congress sorkar hnuaiah Mizo contractor-te aia vai contractor/company-te duhsak zawk an ni ṭhin hi pawi kan ti," an ti a; an hnathawhte thlirin, lungawithlak loh an tih thu an sawi.

MNYF chuan, vai contractor-te'n duhdah taka an thawh ngam fo chhan leh State Referral Hospital tihchangtlunna tur cheng vbc. 18.88 man tender loa hna pekah Chief Minister leh a nau Health Minister ten vai contractor-te aṭangin chan (share) an neih ngei an rin thu an sawi bawk.