Sikul kai hun sawn hma rawtna Cabinet ngaihtuah turin buatsaih

School Education department chuan sikul kái hun sawn hma a nih theih nana ruahmanna an siam chu Cabinet ngaihtuah tura thehluh turin an buatsaih mek.

Hetih lai hian, School Education minister H Ro­hluna chuan, sorkar sikulah quality education a awm theihna atan theihtawp an chhuah thu a sawi.
Vanglaini palai zawhna chhangin School Education Minister chuan, sikul kai hun tihhma chu School Education department-in a din Committee pawhin ṭha an tih thu a sawi a, "Depart­ment thu­tlukna siam theih a ni lo a, Cabinet-in a ngaihtuah ang a, an thutlukna anga kal a ngai dawn a ni," a ti.
Cabinet ngaihtuah tura thehluh a nih tawh leh tawh loh zawhna chhangin, H Rohluna chuan, buaipui mek a nih thu a sawi.
H Rohluna chuan, quality education a awm theihna atan sorkarin theih­tawp a chhuah thu a sawi a, "Vawi leh khatah hmasawn thut chu a harsa. Zâwi zâwi chuan hma kan sawn ve zel. Zirtirtu inpek belhte a harsa a, thawktute chu ṭan la turin kan infuih ve reng a ni," a ti.
Nu leh pa tam zawkin an fate sorkar sikula an luhtir duh loh chung­changah H Rohluna chuan, naupang leh nu leh pate pawhin English medium hrim hrim ngaihsanna rilru an púa a hriat thu Vanglaini a hrilh.
School Education Minister chuan, sorkar sikulah pre-primary school hawn tum a nih thu sawiin, "Thutlukna tak kan la siam lo nâ a, English medium-a kalpui tum a ni. A duh tan chuan Mizo medium ang pawha kalpui theih a ni ang," a ti a; pre-primary school din a nih chuan sorkar primary school-ah pawh zirlai an tam phah a beisei thu a sawi.
Thingtlang sikul leh Aizawl sikula zirtitu dinhmun a inthlau siam rem kawngah, "Hmasawnna a la awm tak tak thei lo," tiin minister chuan a sawi.
H Rohluna chuan, zirtirtu dinhmun inthlauh­na ber chu primary school-ah a nih thu sawiin, "Middle school, high school leh higher secondary-ahte hi chuan an inthlau vak lo," a ti a; Aizawl leh thingtlanga zirtirtu awm zat inthlau lutuk a reh theihna atan theihtawp an chhuah reng thu a sawi.
School Education Minister sawi danin, tun hnai khan primary school-ah zirtirtu 400 dawn headmaster-ah an kaisang a, mahse, Aizawl chhuahsan an hreh vang te, headmaster hna chelh hrim hrim duh loh vangte leh, thil dang vangtein tam tak chuan an hnar a ni.