Zarkawt tlangval bo thiin chhar a ni

December 31, 2014 zan aṭanga bo, Lalnunmawia, Zarkawt chu nimin chawhnu dar 4 vel khan Falkland Veng hnuaia World Bank kawngpui thlangah thia chhar a ni.

Vanglaini thu dawn danin, ruang hi kawngpui thlangah kawngpui aṭanga ft. 150 vela hlaah nu pakhat vawk chaw zawngin a hmu a, mi dangte a hriattir hnuah, police-te hriattir leh nghal a ni. A tirah Lalnunmawia Zadeng a nih leh nih loh hriat a ni lo a, a hnu deuhah Lalnunmawia a ni tih hriat a ni.

Lalnunmawia Zadeng ruang hi nizan khan Aizawl Civil Hospital-ah post mortem a ni a; he thu buatsaih lai hian Zarkawt branch YMA hruaitute chuan nizana vûi nghal a nih dawn leh dawn loh an la sawi thei lo a ni.

Police hotute hnen aṭanga thu dawn danin, Lalnunmawia Zadeng ruang hi a chhe tawh viau a; a hmai hmuh tlak a awm tawh lo a, a pum a puar tawh bakah, a taksate chu a dum deuh vek tawh a ni. A ruang hi a chhiat tawh avangin kut­thlakna hnûhmá nia rinhlelh hmuh a ni lo.

Tarlan tawh angin, HDFC Bank-a deputy manager, Lalnunmawia Zadeng hi December 31, 2014 zan dar 10 vela a chhuak chu a bo zui a, a chhungte leh thiante’n an zawn hnuah, January 3, 2015 aṭangin khawtlangin an zawng a ni.