Paris-ah chanchinbu office beih a ni Editor leh midang 11 an kaphlum

France khawpui, Paris chuan Nilaini khan kum 20 chhunga firfiakte beihna rapthlak ber tawkin, French chanchinbu, Charlie Hebdo office chu silai keng hmaituamte'n luhkhungin, mi 12 an kaphlum a, chin hriat lohin an tlan bo nghal.

Charlie Hebdo chanchinbu hian thil nuihzatthlak leh selna hmanga zirtirna nei (satire) thuziak leh lemziak (cartoon) a tichhuak ṭhin a ni.

Thi zingah hian Charlie Hebdo editor Stephane Charbonnier (47), economist Bernard Maris (68), Philippe Honore (73), cartoonist hriat hlawh tak Jean Cabut (Cabu 76), Georges Wolinski (80) leh Bernard Verlhac (57) te pawh an tel a ni.

Anni bakah khian Proof reader Mustapha Ourrad, psychoanalyst and columnist lsa Cayat leh office khual chhawn Frederic Boisseau (42) te chu misualte kutah hian an thi a, lsa Cayat hi thi zinga hmeichhe awm chhun a ni.

Office-a thawk bakah hian Clermont-Ferrand khawpui aṭanga Paris tlawha zin, Michel Renaud a thi bawk a, chanchinbu editor Charbonnier vengtu, police officer pahnih- Franck Brinsolaro leh Ahmed Merabet-te pawh thah an ni.

SBP police union-a official Luc Poignant chuan Charlie Hebdo office beitute hian pawikhawihna an thlen zawhah lirthei pahnihin an tlanchhe nghal niin a sawi a, mita hmutute chuan hmaituam mi eng emaw zat an tel thu an sawi.

Paris prosecutor thupuangtu, Agnes Thibault-Lecuivre chuan misualte pawikhawihnaah hian mi 12 an thi tih finfiah tawh a ni, a ti.

Islam firfiakte chuan hun kalta aṭang khan France beih tumin vauna thu an lo sawi chhuak tawh a, Charlie Hebdo hian Nilainia beih a tawh hma lawk hian an twitter account-ah Islam state firfiak pawl hruaitu, Abu Bakr al-Baghdadi-a'n kumthar chibai a bukna lemziak a hlimawm zawngin an tichhuak a ni.

Charlie Hebdo hian Prophet Muhammad-a cartoon sawisel hlawh tak tak ṭum eng emaw zat a lo tichhuak tawh ṭhin a, hei vang hian an office chu kum 2011 khan bomb hmanga beih a lo ni tawh. Beih an tawh hnua kum khat dawn ral hnuah Charlie Hebdo chuan Islam sakhaw demna rawngkaiin Muhammad-a cartoon an tichhuak leh a ni.

Nimin khan French police official te chuan pawikhawihtu nia rinhlelh pathum an neih thu sawiin, pakhat chu an kutah a inpe nghal niin an tarlang.

Police kuta inpe hi kum 18 mi, Hamyd Mourad a ni a, eng ram mi nge a nih puanzar a ni lo. Rinhlelh pahnih dangte hi French unau, Said Kouachi leh Cherif Kouachi niin kum 30 vela upa an ni a, nimin khan French police te chuan an thlalak an tlangzarh nghal. Pawikhawihna thleng kaihhnawihah hian French police te chuan rinhlelh pahnihte nena inzawmna nei nia sawi mi pasarih an man tawh bawk.

Official pakhat chuan pawikawihtua rinhlelhte hi Yemen-a firfiak pawlte nen inzawmna nei niin a sawi.

Cherif Kouachi hi firfiaka chetna kaihhnawiha thubuai nei tawh niin, kum 2008 khan Iraq-a helte thawhpuia puh a ni a, thla 18 tâng tura a chungthu relsak a lo ni tawh.

Charlie Hebdo office beitute hian Kalashnikovs silai leh rocket-launcher an hmang niin mita hmutute chuan an sawi a, silai an hmehpuah lai hian French ṭawngin "Prophet Muhammad phuba lak a ni ta" tih leh Arabic ṭawngin "Allahu Akbar" (Pathian ropui ber rawh se) tiin an au, an ti.

France ramin mi sualte beihnaa mi 12 thite a sun laiin nimin vek khan silai keng pakhat chuan hmeichhe police pakhat a kaphlum leh a, pakhatin hliam tuarin, thil thleng hi Charlie Hebdo office beihnaah inzawmna a nei nge nei lo tih finfiah a la ni lo.