2014 chhungin ACH-ah nau 4,810 piang

Kum 2014 chhung khan Aizawl Civil Hospital-ah nau piang 4,810 an awm a, chungte chu mipa 2,515 leh hmei­chhia 2,295 an ni. Mitthi 914 an awm bawk.

Aizawl Civil Hospital-ah hian January-December 2014 chhung khan mi 15,785 admit an ni a, chung zinga 14,891 chu in lama hawtir (discharged) an ni. January-November 2014 chhung bikah Civil Hospital-ah hian zaipui (major operation) tâwk mi 7,097 leh zai tênau (minor operation) tâwk mi 11,382 an awm.

January-November 2014 chhungin ACH OPD-ah mi 3,61,591 an inentir. ACH hotute chuan, OPD card hlui ken leh nachang hre lo an tam ṭhin tih sawiin, chu chu an harsatna tawh pakhat an nih thu Vanglaini an hrilh.

ACH-ah hian dam­dawi-in pantute'n lung­awi lohna emaw, rawtna emaw an neiha lehkha thehluhna tur Complaint Box hmun parukah an dah a, chung­ahte chuan kum 2014 chhung khan complaint-na lehkha 40 a lut tih an sawi.

Zawhna chhangin ACH hotute chuan, tui herhna, electric bulb, thawmhnaw, mobile phone, pawisa leh bag bo report zeuh zeuh ṭhin thu sawiin, damlo leh anmahni awmpuitute chu rûkru lakah fimkhur turin an ngen.

Tun dinhmunah Aizawl Civil Hospital-ah hian thawktu 700 vel an awm a, khum 282 a awm mek a ni.