Charlie Hebdo office beih chungchanga ram hruaitu hrang hrangte thu sawi

"Paris-a tualthahna thleng hi a rapthlak hle a, Chanchinbu zalenna humhalhna leh firfiaka chete dolet kawngah France mipuite kan thlawp tlat a ni," - David Cameron, British Prime Minister

"Kan duh sawi a, kan thil duh sawichhuak thei tura zalen­na kan neih rahbehna a ni a, democracy kalphung beih­­na leh press mite zalenna beih­na a ni," -Angela Merkel, German Chancellor

"Thilthleng hi ka dem tak zet a, France mipuite lamah kan ṭang tlat a ni. Mitthi chhungte kan tawrhpui tak zet e," - Narendra Modi, India Prime Minister

"Pawikhawihna rap­thlak tuartu chhungte ka tawrhpui a, rorelna dik hlenchhuak turin US chuan kawng engkimah France a puih dawn a ni," - Barack Obama, US President

"Nunrawng taka mi dawihzepte chetna hi kan dem tak zet a, firfiaka chet­na dolet tur leh nunna hum­halh turin US leh France chu an ṭangrual leh dawn a ni," - Chuck Hagel, U.S. Defence Secretary

Thunawi:

n Charlie Hebdo chan­chinbu hian huaisen takin an thilchhuah dodalna an lo hmachhawn tawh ṭhin a, kum 2011-a an office beih a nih hnuah pawh "Inhuatna aiin hmangaihna a chak zawk" tih thupui hmangin cartoon an tichhuak a ni.

Kum 2006 khan Charlie Hebdo chuan Denmark chanchinbu cartoon tih­chhuah Mohammed a lem chu an tichhuak nawn leh a, cartoon-ah hian Mo­ham­med chuan mittui tla chungin "Mi tlaktlai lote hma­ngaih nih chu a harsa a ni," tiin a sawi a ni.

Kum 2011, November khan Mohammed cartoon tihchhuak lehin, Mohammed chu chanchinbu chhiartute vauin, "I nui hlum lo a nih chuan vawi 100 hlap i ni ang," tih an sawi tir leh a ni.

Kum 2011-a Mohammed cartoon an tihchhuah hnu lawk hian Paris-a Charlie Hebdo office chu bomb chhiat a ni.

Kum 2012 khan Stéphane Charbonnier chu editor niin, "Muslim te atna" tih thupui hnuaiah Mohammed cartoon tih­chhuah leh a ni a, hei hi ram hrang hrangin dodalin, ram 20-a French embassy leh school te chu khar a ni.

Kum 2012-a thilthleng vang hian Editor Stéphane Charbonnier chuan vauna nasa tak a dawng nghal a, venhimna pek niin, France sorkar aiawhin Foreign Minister Laurent Fabius chuan an thiltih chu a khak a ni. "Meialh laia khawnvartui leihbelh a ṭul kher a mi? tiin Minister Fabius chuan a zilh a ni.

Kum 2012 khan Editor Stéphane Charbonnier chuan, "Kan lemziakah Muslim te an nui duh lo a nih chuan ka dem lo a, French dan hnuaia awm ka ni a, Koran dan hnuaia awm ka ni lo," tiin a lo sawi tawh bawk.

Nilainia Charlie Hebdo office beih a nih lai hian Charlie Hebdo editor-in-chief Gérard Biard chu London-ah a awm a, ani chuan "Chanchinbu chu indona hmanrua a ni lo," tiin a sawi.

UK-a satirical news­paper, Private Eye editor Ian Hislop chuan, "Pawi­khawihna tuartute chuan milem nuihzatthlak siam thei tura an zalennaah man sang tak an pe a ni," a ti.