Hmun hrang hrangah kawng siam mek

Ṭhál a ni chho ṭan mek a, ruahtui tlâk loh lai a nih angin, Mizoram PWD chuan Mizoram hmun hrang hrangah kawngpui siam hna an thawk mek a, kawng an siam mek zinga a tam zawk chu PMGSY kawng a ni.

PWD hotute sawi danin, PWD-in kawng an siam mekte zingah chuan, South Vanlaiphai-Muallianpui inkar kawng km. 13.5-a thui te, Thenzawl-Zote South inkar kawng km. 13-a thui te, West Phaileng-Damparengpui inkar kawng te, NH-54 Khamrang-Mualkhang inkar kawng km. 7-a thui te, Ṭawipui South-Mualcheng inkar kawng km. 10-a thui te, Thingfal-Mamte kawng km. 11-a thuite a tel.

Lungpho-Hmunzawl kawng km. 30-a thui te, Phullen-Phuaibuang inkar km. 49-a thui te, Chhing­chhip-Hualtu kawng km. 20-a thui te, Chhingchhip-Thentlang leh Chhingchhip Hmunṭha inkar kawng km. 24-a thui te, Hmunṭha-Khawbel inkar kawng km. 19-a thuite an siam mek bawk. Kawng an siam mekahte hian blacktop turin lung an phah mek hlawm. Hliappui-Saichal inkar kawng, NEC aṭanga sum hmuh hmanga siam pawh blacktop tura hmalak mek a ni.

World Bank sum hmanga Champhai-Zokhawthar inkar kawng km. 30 vela thui siam tur chu hna ṭan theih ṭep a ni a, he kawng siam nan hian cheng vbc. 137 rua­hman niin, contractor chu TARMAT Ltd., Mumbai an ni. TARMAT hian kawng sial dan tur a en fel mek niin PWD hotute chuan an sawi.

National Highway 44-A aṭanga pênga Léngte khaw bul aṭanga Buarpui tlangdung zuia Chawngte, Diltlang leh Bungtlang South-te kaltlanga Kaladan Multi Modal Transit Transport Poject kawng pawh tura kawng sial tur pawh enfiah mek a ni a; he kawng hi World Bank sum hmanga siam tur a ni. Kawng sial dan tur ruahman tur hian Lea Associate, South Asia-a mi thiamte'n tunlai hian an enfiah mek.

Hetih lai hian, Bairabi-Mamit kawnga Tlawng luia RCC lei dawh hna chawlhsan lailawk chu thawh chhunzawm leh tawh a ni. PWD hotute sawi danin, lei dawhna tura lui laia ban phun chu a àwn deuha hriat a nih avangin hna chawlhsan lailâwk a ni a, consultant ruaiin design siam ṭhat leh a nih hnuah, lei chu an dawh chhunzawm leh tawh a ni.