Mizoram Larsap thar - Aziz Qureshi

Dr Aziz Qureshi chu nimin tlai dar 4 khan Raj Bhavan-ah Gauhati High Court judge Michael Zothankhuma'n Mizo­ram Governor ni turin rin­awm­na thu tiamtirin a la lut.

Governor lak luhna in­khawm hi chief secretary Lal­mal­sawma'n a kaihruai a, chief minister Lal Thanhawla, speaker, minister te, MLA-te leh sorkar mi pawimawh eng emaw zat an tel.

Dr Aziz Qureshi hi February 3, 1940-ah Bhopal-ah a piang a, Political Science, Arabic leh Urdu Literature-ahte M.A a zo vek a, LL.B., Ph.D (Political Science) a nih bakah, Aligarh Muslim University-in doctorate degree a hlan bawk.

Kum 1972 leh 1977 inkarah Madhya Pradesh sorkarah minis­ter a ni a, kum 1988-ah MP atan thlan tlin niin, May 15, 2012 aṭangin Uttarakhand Governor hna a chelh ṭan a ni.

Dr Aziz Qureshi hi thla tuk chhunga (July 2014-January 2015) Mizoram larsap atana ruat parukna a ni a; a hmain Vak­­kom Purushothaman, Kamla Beniwal, VK Duggal, Kateekal Sankaranarayanan, Dr KK Paul-te ruat an ni a; Kateekal Sankaranarayanan chuan Mizoram Governor hna a rawn zawm lo a ni.

Mizoram Governor atan Dr Krishan Kant Paul chu nimin tlai dar 4 khan Raj Bhavan-ah rinawmna thu tiamtira lak luh a ni. Dr KK Paul hi Meghalaya Larsap ṭang lai a ni a, Mizoram leh Manipur Larsap hna hmui tura tih a ni.

Thla ruk chhunga Mizoram Governor

• Mizoram Governor ni lai Vak­kom Purushothaman chu July 6, 2014-ah Naga­land Governor tura sawn a ni.

• July 6, 2014-ah vek Gujarat Governor, Dr Kamla Beniwal chu Mizoram Governor atan ruat a ni.

• Mizoram Governor Kamla Beniwal chu August 6, 2014-ah Governor aṭanga bàn a ni.

• Manipur Governor VK Duggal chu Mizoram hmui turin August 8, 2014-ah Mizoram Governor atan lak luh a ni.

• August 23, 2014 Mizoram Governor atan Maharsatra Governor ni lai, Kateekal Sankaranarayanan ruat a ni.

• Meghalaya Governor ni lai, Dr KK Paul chu Mizoram Governor hna hmui turin September 16, 2014-ah lak luh a ni.

• January 9, 2015-ah Mizoram Governor atan Dr Aziz Qureshi lak luh a ni.