NTSE-ah Lalrinkima Ralte a tling

National Talent Search Examination 2014-ah result tihchhuah a ni a, India ram puma zirlai naupang 884 thlan chhuah zingah Lalrinkima Ralte s/o R Lalhriatpuia, Serkawn, Baptist Higher Secondary School-a Class XI (Science) zirlai a tel.

NTSE huaihawttu chu NCERT niin, kum 1963-ah ṭan a ni a, MAT (Mental Ability Test) leh SAT (Scholastic Ability Test)-te hmanga inel a ni. India rama zirlai naupang inelna lian ber pakhat a ni a, kum tin zirlai nuai thum velin an bei ṭhin. Zirlai thiam bik thlan chhuahte chu scholarship pek ṭhin an ni.

Scholarship an hmuh tur hi Class XI & XII-ah chuan thla tin Rs. 1,250 a ni a, under gaduate leh post graduate an zir laiin thla tin Rs. 2,000 a ni. Ph.D level-ah chuan UGC Norms anga pek a ni thung.