NUHM consultant atan personal interview-a Mark hmu sang ber lak a ni: Health deptt.

National Urban Health Mission (NUHM) hnuaia consultant hna thawk tur laknaah personal interview-a mark hmu sang ber lak a nih thu, Health department chuan a tarlang. Hetihlai hian he hna hi Employment Exchange kaltlanga lak a ni lo.

NUHM-a consultant lak danah thil dik lo a awm nia sawi a ni a, Assembly session-ah pawh sawi chhuah a ni. MNF MLA, Lalruatkima chuan Novemnber 24, 2014-a Assembly session-ah NUHM consultant laknaah thuneitu pakhat inrawlh a awm nia sawiin, Interview Board chairman hnenah a changtu minister-in SMS a thawn a, lak tur a hrilh niin a sawi a ni.

SMS thawna inpuhna chung­chang hi November 25, 2014-a Assembly session-ah Health minister Lal Thanzara'n sawifiahin, NUHM-a consultant laknaa Interview Board chairman hnenah SMS a thawn loh thu a sawi a, SMS thawna puhtu Lalruatkima chu SMS a thawn ngei tih hai lang ngei turin a phût a ni.

NUHM consultant lak chung­chang hi Vanglaini chuan RTI Act hmangin Health department-ah a zawtfiah a; Health department SPIO chuan consultant atan hian interview zinga mark hmu sang ber, Lalhmangaihzuali Ralte (M.Sc. Zoology) d/o R Lianhnuna, Kolasib College Veng lak a nih thu a tarlang.

RTI Act hmanga zawhna chhan­naa a lan danin, NUHM con­sultant lakna tur hian tual­chhung chanchinbu pathumah advertisement chhuah a ni. Interview Board-a chairman chu Health secretary RL Rinawma a ni a; member dangte chu - Health principal director leh NHM mission director Dr K Ropari, Health Services director Dr Rohmingthanga, Hospital & Medical Education director Dr Lalbiakkima, NHM joint mission director Dr T Lalhmangaihi leh, NUHM nodal officer Dr Chawng­thansiami te an ni.

Zawhna chhanna chuan, NUHM consul­tant diltu, inter­view hma­chhawn zingah Nation­al Health Systems Resource Centre (NHSRC)-in NUHM consul­tant ni tura thiamna ngai (Eligibility Criteria) a siam zawng zawng nei kim an awm lo niin a tarlang a, "Post graduate thiamna nei tih a nih avangin chutiang thiamna nei chu lak a ni," a ti.
NHSRC-in Eligibility Cri­teria a siama point hmasa berah chuan, "Post graduation or higher qualification in Public Health, Community Health, Preventive & Social Medicine. MBBS desireable," tih a ni. Point pahnihnaah, "Publish work in the area of health systems or public health (desireable)" tih leh, point pathumnaah, "At least 3 years of post qualification work experience in Health
Systems Research or in Planning or imple­mentation," tih a ni bawk.
NUHM consultant lakna hi Employment Exchange kaltlanga tih a ni lo. Hetih lai hian, sorkar hna a nghet loa thawk tur pawh, thla thum aia rei thawk tur reng reng chu Employment Exchanges (Compulsory Notification of Vacancies) Act 1959 no. 31-in a phut angin, Employment Ex­change kaltlang ngeia lak tur a ni thung.
NUHM hi March 2014-ah kalpui ṭan a ni a, Mizoram NUHM-ah thawktu 91 an awm mek a, chung zinga paruk chu medical doctor an ni.