Mizoramah hun hman zawh ka tum: Larsap

Mizoram Governor thar, Dr Aziz Qureshi chuan, sorkar laipuiin a bàn a nih loh chuan Mizoramah hun hman zawh a tum thu leh Mizoram tan theihtawp chhuaha hna thawh a tum thu a sawi.

Nimina raj Bhavan-a Mizo­ram Larsap tura lak luh a nih hnua thuthar thehdarhtute zawhna chhangin Dr Aziz Qureshi chuan, Mizoram chu bawlhhlawh báwm a ni lo a, India ram bung pakhat a nih angin Mizoram Larsap atana ruat a nihna chu hremnaah a ngai lo tih a sawi a, "Mizoram hmasawnna tur leh mipuite tan theihtawp chhuaha hna thawh ka tum," a ti.

Dr Aziz Qureshi chuan, Mizoram chu ram nuam, remna leh muanna ram a nih bakah, a ram leilung pawh mawi a tih thu sawiin, Mizoram Larsap a ni thei chu lawmawm a tih thu a sawi a; kum 1960 velah inthlan chungchangah Mizorama a kal tawh thu sawiin, tunah chuan Mizoram chu nasa takin a danglam tawh tih a sawi a ni.

Supreme Court-a sorkar laipui a khin chungchang zawhna erawh chu Larsap chuan a chháng duh lo a, sawi tur a neih loh thu a sawi. Dr Qureshi chuan, Mizoram khaw hrang hrang, a tam thei ang ber tlawh chhuah a tum thu a sawi bawk.