Kum dang aiin thil ṭha lo thleng a tlem: HM Zira

Home minister R Lalzirliana chuan, Krismas leh kum thar lawmna neih zawh takah kum dang aiin Aizawl leh a chhehvelah thil ṭha lo leh fel lo thleng a tlem niin a sawi.

Thingsul Tlangnuam MHIP building thar nimina a hawnnaah thu sawiin R Lalzirliana chuan, "Mizoramin hma kan sawn zel a, sorkar inrelbawlnaah pawh a ṭha turah chuan huai taka kaltlangpui zel a ngai a ni," a ti.

Home Minister chuan, mihring nunah hunbi a awm a, hlim ni, lawm ni leh lungngaih ni leh ṭah ni a awm ṭhin tih sawiin, "Pathian ringtu kan ni a, kumkhuain a ngai renga awm thei kan ni lo," a ti a; hun thim a lo thlen pawha inngaihtuah kun reng lo turin Mizo mipuite a chah.

Mizo hmeichhia zingah kawng hrang hranga mi chhuanawm tak tak leh sûlsutu an pung zel tih sawiin, R Lalzirliana chuan, "Tunah chuan hmeichhe finin tuikhur ràl a kai tawh. Chutih rualin, Bible thu kan hriat reng a, kan zawm a pawimawh. 'Hmeichhe lú mipa, mipa lú Krista' tih a nih avangin, mipate thlazâr hnuaiah hmasawn zawnga ke pên a him a ni," a ti.

Minister R Lalzirliana chuan, Central sorkar tih dan anga MLA-te bial ṭheuha model village thlan turah a bial (Ṭawi)-ah chuan Thingsul Tlangnuam chu thlan a nih thu a sawi a, model village entawntlak ni thei tura theihtawp chhuah turin Thingsul Tlangnuam mipuite a sáwm a ni.