Chhungkaw khata 5 thahte vui liam an ni Tualthattu Laltlanchhuaha Central Jail-ah

Sangliansiama leh a chhungte Republic Veng, Zirtawpni zana an in chhunga misual kut tuara thite chu Inrinni khan vui an ni. He tualthahna kaihhnawiha man Laltlanchhuaha (37) s/o Parzuala, Republic Veng (Field Veng) chu Central Jail-ah dah a ni a, police-te'n thu an zawtfiah mek.

Pawi khawihna thlen dan

Police hotute aṭanga thu dawn danin, Laltlanchhuaha hi zan dar 7:30 velah Republic Presbyterian biak-in thlanga an chhungkaw ṭhian, Sangliansiama (57) s/o. Chal­neihthianga (L)-te inah a lut a, Sangliansiama chu pawisa dilin, Rs. 1,000 a lo pe a ni. Laltlan­chhuaha chuan pawisa a dil belh a, Sangliansiama chuan a remtih loh avangin Laltlanchhuaha chuan Sangliansiama chu a chemtein a vit ta nghal a ni.

Sangliansiama nau Vanlalchhungi (54) au chunga pawna tlân chhuah tum chu hnûk lutin, a vit ve leh a, kawngkapui chu in chhung lamah a kalh nghal bawk. Sangliansiama nupui Khualthangi (57) mut pindan lama tlan lut chu umzuiin a vit leh a; chumi hnuah an fapa Isaac Lalrinnunga (5) leh Sangliansiamate nau Samuel Lalrinchhana (14) te a vit leh bawk. Samuela hi Sang­liansiama nau Laldinliani leh Chalkunga, Chungtlang khuate fapa a ni a, class IX zirlai a ni.

Sangliansiama, Khualthangi, Vanlalchhungi leh Samuel Lalrinchhana te hi inah an thi nghal a, Isaac Lalrinnunga chu damdawi-in panpui a nih laiin a thi. Sangliansiama te awmpui nula Lalzepuii erawh chu bual pindanah a inkalhnan hman avangin a him a ni.

Laltlanchhuaha pawi khawih­na thawm hriain ṭhenawm khaw­vengte an pungkhawm nghal a, Laltlanchhuaha chu in hnung lam tukverh aṭanga chhuakin, a uai thla a, lei a thlen dawnah a tla zui a; Sanglianthanga building chhâwng hnuai lama Springfield HSS hostel naupangte'n an lo man hman a ni.

Laltlanchhuaha hi kut an thlak nual hman a, a hnuah Sangliansiama te thenawma Vanlalhluti inah nawr luh a ni a, khawtlang hruaitute leh police-te'n an veng a ni. Laltlanchhuaha hi mipui thinrimin lak chhuah an tum a, hun rei tak nasa takin police-te nen an innawr. Mipuiin lung leh thil danga an vawm nasat avangin police leh khawtlang hruaitu zingah hliam an awm nual a, damdawi-in panpui ngaite pawh an awm. Laltlanchhuaha scooty chu zan dar 12 pelh hretah mipuiin an hâl a ni.

Vanlalhluti in hi Assam type a ni a, a bul chiaha a fapa R Lalthang­mawia in, Assam type nen a bang tile, tukverh, in chung rangva leh khumte a chhe nual a, pawisa Rs. 4,000 vel a bo bawk. DC Dr Franklin Laltinkhuma chuan heng in chhiate hi a tul anga DC office atanga thuam a nih tur thu a sawi.

Laltlanchhuaha chu zing dar 2:30 velah in hnung lamah police-te'n an hruai chhuak a, chumi hnu zing dar 3:30 velah mipui an ṭin darh a ni.

Mitthi ruangte hi police, magistrate leh forensic mite'n uluk taka an endik hnuah zan dar 12:30-ah Aizawl Civil Hospital panpui a ni a, Inrinni zing dar 6-ah endik zawh a ni.

Vuina programme

Sangliansiama, Khualthangi, Vanlalchhungi, Samuel Lalrinchhana leh Isaac Lalrinnunga te chu Inrinni chawhnu dar 2-ah Republic Veng YMA Hall-ah vui an ni. Salvation Army officer, Major S Biakliana'n a vui a, Vanlalchhungi chu a lawina kohhran, Mizoram UPC pastor, F Lalnghakliana'n a vui thung. Samuel Lalrinchhana chu vuina inkhawm hman zawhah an khua, Chungtlang panpui a ni a, mi dang palite chu Republic Veng thlânmualah phûm an ni.

Vui inkhawmah hian chief minister Lal Thanhawla pawhin thu a sawi a, Sangliansiama te chhungkaw chunga thil thleng chu rapthlak a tih thu leh, Sangliansiama chu a mi hriat chian, nau anga a en thin a ni tih sawiin, sorkara a hnaah pawh mi rinawm nia a hriat thu a sawi a; pawi khawihtu chu a phû tawka hrem ngei a nih theih nan dan lek kawhtute pawhin ro an rel a beisei thu a sawi bawk.

Republic Veng branch YMA president, R Vanlalsawma pawhin thu sawiin, pawi khawihtu chungah dan anga a na thei ang bera hremna pek an phût thu a sawi a; an vengin chhiat an tawh vanga lainaitute zawng zawng chungah an lawm thu te, ruang endik a nih dawna lo buaipuitu leh thingpui leh a hmeh lo hluitu Dawrpui YMA chungah te, kuang tumpuitu Darpui leh Chanmari branch YMA chungah te, Central YMA leh sorkar chungahte an lawm tak zet thu a sawi bawk.

Mi palite phûmna tur thlan laihnaah hian veng neitu Republic Veng bakah, Aizawla YMA branch 22 atangin mi 1,600 zet an thawk chhuak a ni.