Khawthlir

Missionary Day
Nimin Pathianni, January 11 kha Missionary Day a ni a, Mizoram Baptist Kohhrante chuan uar takin an hmang a; thupui chu 'Chanchin ṭha malsawmna leh Mizo mipuite' tih a ni. Kumina Missionary Day hi Pathianni a nih avangin, BCM tualchhung kohhran ṭhenkhat chuan Inrinni khan Missionary Day lawmna ruai an ṭheh a ni.

MHIP Rûn hawng
Ṭhuampui MHIP Rûn sak thar chu January 10 khan AMC executive councillor Lalmalsawmi'n a hawng. MHIP Rûn sak nan hian bialtu MLA, AMC chairman leh vice chairman-te sum pek hmangin, Rs. 5,09,491 sênga sak a ni.

BCM seminar
BCM chuan Inrinni khan Aizawl Central Church biak-inah Aizawl khawppui chhunga BCM kohhran hrang hrang huapin mission chungchang zirhona leh inràwnkhawmna a buatsaih a; BCM associate general secretary Rev.Dr K Lalrinthanga, Rev. Lalthanzauva leh Upa KL Biakchung­nunga te resource person an ni.

In kâng
C Vanlalmuana, East Lungdar in chu Inrinni zan dar 6:30 vel khan bungraw chuh hman lohin a kâng ral. East Lungdar YMA hruaitute hnen aṭanga thu dawn danin, in kan ṭan laiin inah awm an awm lo a, a kan chhan hriat a ni lo. In kanna hmunhmate chu nimin khan East Lungdar khawtlangin an thianfai a, ṭanpuina khawna sak ṭhatsak an tum a ni.

BJP-in tawrhpui
BJP Mizoram Pradesh chuan thuchhuah siamin, January 9 zana Sangliansiama leh a chhungte an ina thah an ni chu pawi an tih thu leh an tawrh­pui thu an tarlang a; tual­thattu Laltlanchhuaha chu a thil tih phu tawkin hrem ngei se an duh thu leh inthahna rapthlak thleng tawh lo se an duh thu an sawi bawk.

MPCY lawm
MPC ṭhalaite chuan thuchhuah siamin, Rajya Sabha MP Ronald Sapa Tlau-in State Level Consultative of Food Corporation of India-ah chairman nihna a chang chu lawmawm an tih thu an tarlang a; "Hetiang dinhmun sang leh pawimawh a chang hi Zoram mipuite, a bikin thingtlang lam mite'n ration buhfai quota an khamkhawp lohna phuhrûksak turin theihtawp chhuah se kan duh a ni," an ti.