VIP light vuah thei chin siam thar a ni

Mizoram sorkar chuan sorkar mi pawimawh, an offcial car chunga êng (VIP light) vuah thei chin a siam thar. VIP light vuah dan tur chi hrang panga siam niin, a vuah thei chinah mi eng emaw zat dah luh thar a ni.

Transport secretary Hrangtawna chuan, VIP light vuah dan tur leh a vuah thei chin siam thar chu an zâwm ṭha thawkhata a hriat thu a sawi a; VIP light vuah tura tarlan loh, mahni thua lo vuahte chungah dan lekkawh turin harsatna a awm thu Vanglaini a hrilh.

Hrangtawna chuan, Mizoram kawngte a chêp avangin VIP light vuahte tan pawh tlân pur pur theih a ni lo tih a sawi a, VIP light chhi tura tih ni loin an lo chhi ve a nih pawhin, mipui tan a hnawksak lem lo niin a sawi bawk.

VIP light chhi thei chin tih thar­ah hian hriattirna chhuah hma­sak zawka chuang tawhte paih an awm lo a; chhi tura tarlan ve lem loh sorkar official, an tlukpuite chhit ang chhi ve thei an nih thu a la chuang bawk. He mi chungchangah hian Transport secretary chuan, Supreme Court order leh state danga an kalpui dan an lak khawm a nih avangin lehlin dan sawi a harsa niin a sawi.

Rank puite'n an vuah vanga mahni thua vuah vete chungchangah, "Mi zahawm rual an ni a, an hrethiam ve mai turah ngaih a ni," a ti.

VIP light hi mimal lirtheiah vuah phal a ni lo a, sorkara an hnathawhna piah lamah chuan khuh bo tur a ni a; thupek siam thar hian a hmaa thupek chhuah chu a luahlan nghal a ni. State ṭhenawm Meghalaya, Assam, Manipur leh Sikkim tih dan leh Supreme Court order en chunga thupek hi siam a ni.