National Youth Festival-ah Zodintluanga
19th National Youth Festival, Guwahati-a neihah January 10 zan khan Sports & Youth Services minister Zodintluanga'n a thu a sawi a; ṭhalaite chu India ram tihmasawn leh tiropuitu tur an nih thu a sawi.
Zodintluanga hi Union Minister for Youth Affairs & Sports Sarbananda Sonowal chuan Youth Festival-a thu sawi turin a sáwm a ni.
Zodintluanga chuan, India ram chu ram zau tak a nih avangin hmun hrang hrangah nunphung leh thil tih dan phung hran a awm thu a sawi a, "Hetiang a nih avang hian ṭhenawm state-te biakpawh kawngah harsatna a awm phah ṭhin," ti.
State leh state inkarah thil ho tê tê vangin inhriatthiam lohna a awm ṭhin thu sawiin, Zodintluanga chuan, "He thil ṭha lo tak hi tihreh tura hmalak a ṭul tak zet a ni," a ti a; inngeih tlang taka India rama chengte kan awm chuan India ram chu ram ropui tak a nih tur thu a sawi.
Sports Minister chuan, science leh technology lama hmasawnna ringawtin India ram chu chenna nuamah a siam dawn lo tih sawiin, "Hmasawnna lo thleng tur hi kan lo dawnsawn thiam a pawimawh tak zet a, chu chu ṭhalaite hmanga tihhlawhtlin theih a ni ang," a ti.
Zodintluanga chuan, kum 2011 chhiarpuiah India ram mipui 65% chu kum 35 hnuai lam an nih thu sawiin, "Ṭhalaite hi ram hmasawnna atana pawimawh ber an ni. India rama chengte hi inlungrual taka kan kalho a pawimawh," a ti a; ṭhalaite'n inunauna rilru an put phawt chuan khawvela ram thil ti thei berah India ram a awm tur thu a sawi.
Youth Festival-ah hian Lok Sabha MP-te bakah, college professor, social worker leh mi thiamte'n thu an sawi a; India ram state hrang hrang aṭangin ṭhalai 3,000 vel an kal khawm.
Minister Zodintluanga hian Union minister Sarbananda Sonowal chu Circuit House-ah a kâwm nghal a; Zodintluanga chuan, Lawngtlaia CYLA khelmualah phûl lem phahna tur project, Sports Ministry hmasaa an thehluh tawh chu a hma thei anga tihfelsak turin a ngen. Union minister Sonowal chuan, document kimchang Ministry-a thehluh leh a nih hunah a hma thei anga chinfel a nih tur thu a lo hrilh a ni.