Home Minister-in mi in tichhiat a dem

Home minister R Lal­zirliana chuan, Sanglian­siama te chhung­kua that­tua ngaih Lal­tlanchhuaha hmuh duh vanga mipui thinrimin Laltlanchhuaha dahna in, Vanlalhluti in leh R Lalthangmawia te in an tichhia leh Rs. 4,500 a bo chu pawi a tih thu a sawi.

R Lalzirliana chuan, Sangsiamliana te chhung­­kaw chunga thil thleng chuan a barakhaih tak zet tih sawiin, thi ta chhungte chu thinlung taka a tawrhpui thu a sawi a, "Hetiang thil ṭha lo leh rapthlak tak hi thleng tawh lo se kan duh tak zet a ni," a ti.

Vanduaina rapthlak a thlena a hmun thleng hmasate'n mitthi thlalak leh thlalak dang, hmuh hrehawm tak takte mi dang hmuh theih tura internet kaltlanga an thawn darh ṭhin chu thil ṭha lo a nih thu sawiin, R Lalzirliana chuan, a tuartu chhungte leh hmeichhe tan phei chuan thil hmuh hrehawm tak a nih thu a sawi a; tun hnuah chuan thlalak hmuh hrehawm lutuk chu thawn darh tawh lo turin mi tinte a ngen a ni.

Home Minister chuan, Sangliansiama te chhungkua thattua ngaih man a nih hnua police-te kuta a awm tawh mi ṭhenkhatin phuba la tura kut thlak duhna rilru an pú chu thil ṭha lo a nih thu a sawi a, "Pathian thuin phuba reng reng la lo tur leh phuba chu Ama lak tur nia a sawi laiin, phuba lak duhna rilru pû a, police-te'n pawi khawihtu an kawlna in thlenga tihchhiat a ni hi thil pawi tak a ni," a ti.

R Lalzirliana chuan, Laltlanchhuaha an dahna in neitute pawisa, Rs. 4,500 a bo nia an sawi chu pawi a tih thu sawiin, Mizote'n pi leh pute hun aṭanga an ngaihsan, ṭhian chhan thih ngam rilruah chuan mi dangte harsatna siam zawng leh mi in tichhe zawnga chet duhna a awm lo tih Mizo mipuite'n kan hriat nawn leh ṭul a tih thu a sawi bawk.