Synod-in pastor bial thar 15 a hawng

Inrinni khan Mizoram Presbyterian Kohhran pastor bial thar 15 hawn a ni a, nimin khan pastor eng emaw zat an awmna thar turah lak luhna inkhawm (induction service) neih a ni bawk.

Synod Inkhawmpui 2014-in a rel angin, pastor bial tharte hi Inrinni khan hawn a ni a; chungte chu Mizoram chhungah - Hunthar Bial, Zemabawk North Bial, Nisapui Bial, Vairengte Chhimveng Bial, Suarhliap Bial, Pangbalkawn Bial leh Damdep Bialte an ni. Mizoram páwnah Manipur-a New Lamka Bial, Kolkata-a Bardhoman Bial, Jharkhand-a Kairabari Bial, Nepal-a Pokhara Bial, Siliguri-a Belakhora Bial, Patna-a Darbhanga Bial, Barak area-a Bhaga Bial leh Karbi Anglong-a Longnit Borjan bial tharte hawn a ni.

Nimin Pathianni khan Mizoram chhunga pastor bial 32 leh Mizoram pawna pastor bial 26-ah pastor induction service neih a ni a; pro.pastor thar 26 leh pro.pastor ni lai panga an awmna siam remte induction service neihpui an ni bawk.

Mizoram Synod chuan India ram khawpui - Delhi, Hyderabad leh Kolkata-ahte kumin aṭangin pastor a dah thar a, anni hi Synod puipate zinga mi pahnih zelin induction service an hmanpui a ni.

Synod hruaitute hnen aṭanga thu dawn danin, khawpui lian pathuma pastor dahte hian Presbyterian Kohhran mite tan bik inkhawm an neihpui dawn lo a, Mizo inkhawmah telin, rawngbawlna ṭul ang ang an khawih dawn a ni.