Khawthlir

MPF president
Mizoram People Forum (MPF) chuan nimin khan Synod Office-ah president mawhphurhna inhlanna inkhawm an hmang. MPF president kal chhuak, Rev. K Lalhmuchhuaka'n president thar tur, Synod moderator, Rev. Lalrinmawia hnenah mawhphurhna a hlan a ni. MPF president hi an pawl danin a sawi angin, Synod moderator apiang­in an chelh ṭhin a, Rev. Lalrinmawia hi MPF president 10-na a ni.

YMCA meeting
YMCA NE Region-a chairman, minister Lalrinmawia Ralte, general secretary Mani Kumar leh YMCA NE Board member dangte chuan nimin khan Guwahati Mizoram House-ah Jorabhat-a YMCA Youth Centre sak mek chungchangah an sawiho. Youth Centre sak mek hi Aizawl YMCA-te hmalakna a ni a, engineer K Lalsawmvela'n a enkawl mek a ni.

PEC hawng
Nimin khan Aizawl DC office-a Census Cell-ah AADHAR Card la nei lote'n thla an lak theihna turin Permanent Enrolment Centre (PEC) hawn a ni. Permanent Enrolment Centre (PEC) hi LYRA company hnuaia thawktu mi pahnihin biometric thlalakna khawl nen office hawn chhungin an vil dawn a ni.

R-Day sawiho
Lunglei DC, Ashish Madhaorao hoin nimin khan sorkar mi pawimawhte'n DC conference hall-ah Lungleia Republic Day hman dan tur an rel a, Ṭhuamluaia Muala hman turin thutlukna an siam. Republic Day pual hian sakhaw hrang hrangah biak-inah ṭawngṭaina neih tura tih a ni.

Infiammite lawm pui
Directorate Sports & Youth Service buatsaihin nimin khan National School Games 2015 a Girls Hockey Champion Team-te lawmpuina an conference hall-ah neih a ni a, Sports secretary Zothankhuma'n a hman pui. 60th National School Games hi January 3-7 chhungin Ranchi ah neih a ni a, Mizoram aiawh hian Girl Hockey Academy, Thenzawl a zirlaite an tel a ni.