Buhfai thubuaiah chargesheet peih tawh

October 8, 2014 zana Kolasib Supply kudam aṭanga buhfai ip 140 dan loa phurh chhuah chungchang thubuaiah nimin thleng khan police-in Court-ah chargesheet an la thehlut lo. Hetih lai hian, case IO chuan chargesheet a peihfel tawh thu a sawi.

Buhfai chingpen chungchang hi Kawnpui Police Station-a sub-inspector in a chhui a, December, 2014-ah case IO chu thlakin, Kolasib SDPO-in a chhui zui a ni.

Kolasib SDPO chuan, chargsheet thehlut turin prosecution sanction an dil mek tih a sawi a, an hmuh veleh chargesheet thehluh an tum tih a sawi.

Buhfai an mante hi Kawnpui PS-ah dah a la ni a, Court-a thubuai kal lai a nih avangin khawih chêt lohin a awm. Court-in buhfai phurhna motor a chhuahtir hmain police station kawtah dintir a ni a; ruahsûr vangin buhfai ip 13 chu ei tlak lohin a chhe hman a, tunah chuan police building chhungah dah luh tawh a ni.

Tarlan tawh angin, dan loa buhfai ip 140 Kolasib kudam aṭanga phurh chhuah chungchangah hian Kolasib DCSO, PL Zohmingliana chu a mawhphurtu berah puh a ni. PL Zohmingliana hi police-te'n an man tawh a, mahse court-in bail-in a chhuah a ni.