Congress sorkar hrawn a hrehawm tial tial - Lalduhoma

Zoram Nationalist Party (ZNP) general headquarters office chu nimin khan kum 2015 atan hawn a ni a; ZNP president Lalduhoma’n thu sawiin, Congress sorkar chu mipui tan hrawn an hrehawm tual tual niin a sawi.

Lalduhoma chuan, “Kan sorkar hi hrawn a hrehawm tual tual a, kumin aṭangin buhfai a man toin kan lei a ngai ta. Hei hi Central sorkarin buhfai man a tihto tâk vang a ni lo a, Mizoram sorkar Cabinet meeting remtihna angin December 23, 2014 khan order tihchhuah a ni," a ti.

ZNP president chuan, lirtheia high security registration plate vuah chungchangah sawiin, "Motor bo awmna hmun chu khawi hmunah pawh chhui chhuah theih a ni ang. HSRP hi sorkarin mipui a bumna a ni. He mi avanga motor bo an hmuh chhuah tâk sawi tur a awm lo. Sum an tuakna mai a ni a, tuna la ti ve lo zawngte pawh hi kan sorkar hian ti turin phût lui tawh suh se," a ti a; HSRP vuah leh vuah loh chu mimal zalennaa dah ni se an duh thu a sawi.

Sorkarin blood bag man a lak tawh tur chungchangah Lalduhoma chuan, "Damlo thisen pek a ngai ṭhin a, tlawmngai pawl leh kohhran ṭhalaite'n a thlawnin thisen an pe ṭhin. Kan mamawh ngawih ngawih hi sorkar chuan sumdawn nan an lo hmang duh ta a, a hreawm hle a ni," a ti.

ZNP president chuan, sorkar chu sum leh pai harsatna vanga thu dik tâwk lo phuahchawpa mipui bum chíngah puhin, ti tawh lo turin a chah a, "Sorkar puilting lo zia a ni,” a ti. Congress sorkar chu mipuiin an hriat tawh sa a nih thu sawiin, mipuite'n an tuh rah an sêng mek niin a sawi a, "Zoram mipuite hi ngaihtuahna thar hmang tawh turin ka chah duh a ni,” a ti.