Kum 2014 chhunga pawikhawihna 121 Forensic hmangin endik a ni

Forensic Science Laboratory (FSL)-a mi thiamte chu, kum 2014 chhung khan pawi khawihna (crime scene) hmun 121-ah an kal a, thubuai 1,154 an enfiah zo. FSL hotute chuan, pawi khawihna a thlenin, pawi khawihna thlenna hmun a zau thei ang humhim a, tihchingpen a nih lohna tura fimkhur turin mipuite an ngen nawn.

FSL office-ah hian chhuifiahna khawl pasarih an nei a, chung­te chu mithiam pahnih zelin an enkawl a ni. Chemistry Division, Toxicology Division, Question Division, Fingerprint Division, Ballistic Division (puak thei thil, etc.), Sirology Division (thisen, chil, zun, etc.) leh Photography Division-te a awm.

FSL hian kum 2014 chhung khan pawi khawihna kaih­hnawihah thubuai hrang hrang 1,154 an enfiah zo a, hnu chhuina kaihhnawih péng hrang hrang an hmuh chhuah zat chu 18,614 a ni. Pawi khawihna hmun 121-ah an kal a, pawi khawihna thubuai leh an endikna kaihhnawihah Court-ah vawi 383 an ding a ni.

Tualthihna leh pawi khawihna chi hrang hrang a thlen chángin Forensic lama mithiam­te'n pawi khawihna thlenna hmunte uluk takin an endik ṭhin a, pawi khawihtu dik tak chhui chhuah a nih theih nan endik a nih hma chuan thil thlenna hmun tihdanglam loha awmtir a pawimawh thu an sawi.

FSL hnathawh dan chu mipui hriat tura puanzar remchang lo a nih thu sawiin, FSL hotute chuan, police-te an puihna avanga pawi khawihtu dik tak man an tam phah tawh thu an sawi. Police hmaa inpuanna hi thu tling a nih mai loh avangin scientific proof hi a pawimawh hle a, khawl hmanga thil nihna dik tak finfiahtu an ni.

Vanglaini palaiin an kawmnaah forensic mithiamte chuan, finfiahna ṭha tak a awm theih nan bungrua leh hmanruate venhim a pawimawh thu te, pawi khawihna hmuna mipui pungkhawmte'n hnuchhuina an tihbuai theih avanga thil tisualtu chhui chhuah theih loh a awm phah nual tawh thute an sawi.

Aizawla FSL mithiamte chu Mizoram hmun hrang hranga pawi khawihna a thlenin finfiah hna hrang hrang an thawk ṭhin a, thihna kaihhnawiha rinhlelh­awm chhuinaah chuan an tel deuh vek a ni.

Forensic-a thawktute chu dan angin police-te chiahin an ko thei a, police kaltlang loin mahni thua koh ve ngawt theih an ni lo. Pawi khawihna a thlenna hmunah police-a case investigating officer (IO)-te'n mipui an khapna kawngah an duhthu a sâm loh fo avangin, an hna atan a pawimawh avang chauhin an tih loh tur thlenga mi an khap a ngaih chang a awm niin an sawi a, case IO-te ngei pawh an tirh kual cháng a awm ṭhin niin an sawi.

Thurûk an vawnna lamah an thubuai khawih bik chu an thawhpuite laka zêpte pawh an nei ṭhin niin an sawi a; tun hnaia Lalnunmawia Zadeng, Zarkawt ruang Forensic lamin an chhuina thu an thehdarh anga thuthang awm chu, thudik a nih loh thu an sawi bawk.