MNF-in VC/LC thlanah unit dah pawimawh
MNF vice president Dr R Lalthangliana chuan, February thlaa Mizoram district paruka village council leh Aizawl Municipal Council hnuaia local council inthlanah an party unit-te duh dan an dah lal ber dawn tih a sawi.
Dr R Lalthangliana hian nimin khan Lungleia Mizo Hnam Rûn hawnna inkhawmah thu a sawi a, “Kan hma lawka VC leh LC inthlan lo awm turah MNF chuan thawhpui tur emaw, thawhpui loh tur emaw a siam dawn lo a, party unit-te’n a ṭha ber tur thlira an duh dan apiang general headquarters chuan a pawm dawn a ni," a ti.
Kum tir aṭanga Mizorama chhiatna rapthlak tak tak a thleng chu a ngaihna hriat har a tih thu sawiin, R Lalthangliana chuan, "Zu zawrh hun a hnai ta hle a, nu leh pa tam tak chu an rum lâwk a ni," a ti bawk.
Dr R Lalthangliana chuan, Congress sorkar chu chhiatna thlenga mawhphurhna la ngam lo-ah puhin, vanduaithlak a tih thu a sawi a, "December 13, 2014-a Darzokai lei dawh chim chhanah chief minister-in ‘Mipui nawr chim’ tiin puh tur a zawng a, ram khat hotupa ber thusawiah chuan a mak hle,” a ti a; Darzokai lei chim chhan chu Judicial Inquiry hmanga chhui ngei an duh thu a sawi.
MNF vice president chuan, MNF Lunglei sub-headquarters mipuite chu "Pathian leh kan ram tan' titu an nih angin, Pathian leh Mizoram tana theihtawp chhuah turin a chah. MNF president Zoramthanga, Myanmar sorkar leh hel pawlte inkara remna palai hna thawk tur chu ṭawngṭaipui turin a sáwm bawk.