Mipuiin in an tihchhiat thawm ṭha

Sangliansiama, Republic Veng-te chhungkuaa mi panga thattua puh, Laltlanchhuaha hmuh duh vanga mipui thinrimin in an tihchhiat, Lalhluti in leh a fapa R Lalthangmawia te in chu nimin khan Republic Veng YMA bultumin hnatlanga thawm ṭhat a ni a, mi 100 chuang an thawk chhuak.

Thu dawn danin, Lalhluti leh R Lalthangmawia te in sakna senso leh hmanrua ṭul ang chu Aizawl DC office lamin an tum a; bialtu MLA R Vanlalvena'n Rs. 10,000, Home minister R Lalzirliana'n Rs. 5,000, bialtu AMC councillor F Lalhuthangi'n Rs. 2,000, parliamentary secretary Lt.Col. ZS Zuala'n Rs. 1,000 an thawh bakah, mi ṭhahnemngaite'n pawisa an thawh a ni.

Hetih lai hian, Republic Veng khawtlang chuan an venga chhiatna rapthlak tak thlenga thite chu an sûn a ni tih entir nan leh tualthahna an duh lohzia entir nan nimin zing aṭang khan an venga in tinah puan dum an zár a, kar khat chhung an tár dawn a ni.

Mi panga thattua puh, Laltlan­chhuaha pa, Parzuala chuan, a fapa pawi khawih rapthlak tak avang leh Mizoram mipui a tihbuai leh tihthlaphân avangin ngaihdam a dil a; ngaihdam leh thupha chawi tlâk lo ni mah se, a fapa thil tiha a thupha chawina leh ngaihdam dilna chu pawmsak turin lusûn chhung te, Republic Veng mipui leh Mizoram mipuite a ngen a ni.