December 31, 2014-ah pollution a tlahniam

Kum hlui 2014 thlah zana ri bengchheng (noise pollution) leh boruak chhia (air pollution) chu kum hmasa aiin a hniam zawk a; kum 2014 chhung zawng boruak erawh kum 2013 aiin a chhe zawk.

Mizoram Pollution Control Board (MPCB) chuan kum 2015 kum thar lai vela Aizawl boruak dinhmun khawl hmangin an teh a; tehna chu hmun pali - Khatla, Laipuitlang, Bawngkawn leh Dawrpui-ahte an dah. Tehfung pali - Suspended Particulate Matter (bawlhlawh nâwi léng vel), Respirable Suspended Particulate Matter (bawlhlawh nâwi zual, hîp luh tham lek) leh, gas lam chi, - sulphur dioxide leh nitrogen dioxide-te hmangin boruak bawlhlawh dan chu teh a ni. Ri bengchheng (noise level) teh a ni bawk.

Aizawl khawpuia hmun palia tehnaa a lan danah chuan, kumin tìra boruak chu kum 2014 aiin a ṭha hret a ni a; Decem­ber 31, 2013 - Janua­ry 1, 2014 chhung­in Nitrogen Dioxide (NO2) chu 14 (µg/m3) a nih laiin, December 31, 2014 - January 1, 2015 chhung­in 9.00 (µg/m3) a ni.

Respirable Suspended Particulate Matter (RSPM) pawh a tlahniam a; December 31, 2013 - January 1, 2014 chhung­in 60 (µg/m3) aṭangin December 31, 2014 - January 1, 2015 chhungin 40(µg/m3)-ah a tlahniam. Bo­ruaka bawlhhlawh nâwi lêng vel, Suspended Particulate Matter chu nasa takin a tlahniam a; 152 (µg/m3) aṭangin 98 (µg/m3)-ah a tlahniam a ni. Sulphur Dioxide chu tun dinhmunah chuan sawi tham loh khawpa hniam, below detection level-a tlêm a la ni bawk.

Ri bengchhen zawng tehnaah, December 31, 2013 zana ri bengchheng chawhrual chu 59.03 Leq.dB a ni a, a rin lai ber (Lmax) chu 94.6 dB a ni. December 31, 2014 zanah erawh chuan average chu 55 Leq dB a ni a, a rin lai ber (Lmax) chu 70.56 dB a ni.

Hetih lai hian, kum khat chhunga dinhmun tehnaah erawh chuan kum 2013 aiin 2014-ah pollution a nasa zawk hle a; Dawrpui huam chhung bikah phei chuan sorkarin him chin a bituk, (national standard) a pelh chang a tam hle tih an tarlang.