PE Dept-ah post ruak 47.11% a awm; Thawktu indaih loh vangin harsatna an tâwk
Power & Electricity department-ah sanctioned post 2,163 a awm a, chu'ng zinga 1,144 chu hnawhkhah niin, post ruak 1,019 (47.11%) a awm. PE department hotute chuan, thawktu indaih lohna avangin harsatna an tâwk nasa tih an tarlang.
RTI Act, 2005 tlawhchhana zawhna PE department SPIO-in a chhan danin, sorkar sum kum kal mek (2024-25) dinhmun angin PE department-ah sanctioned post 2,163 a awm a, chu'ng zinga 1,144 (52.89%) chu hnawhkhah niin, post ruak 1,019 (47.11%) a awm. Post ruak zingah electrical worker post ruak a tam ber a, post 400 zinga 177 (44.25%) chiah hnawhkhah niin, post ruak 233 (55.75%) a awm a ni.
SPIO tarlan danin, PE department-ah hian post hrang hrang zingah sanction post awm si, mahse, hnawhkhah miah lohna hna chi hrang pariat a awm a; chu'ngte chu - line supervisor, head mechanic, senior lineman, senior switchboard operator, senior engine operator, senior blacksmith, senior meter reader leh aircompressor operator-te a ni.
PE department hotute chuan, thawktu indaih lohna avangin harsatna an tâwk nasa tih an tarlang a, "Sanctioned post hnawhkhah vek theih a nih loh avang hian a bikin officer level-ah mi pakhatin post pakhat aia tam chelh a ngai ṭhin a, tunah pawh post pahnih/pathum chelh kawp an awm. Hei hian hnaah nghawng a nei nasa a, post hniam lama indaih lohna pawhin hnathawhnaah harsatna a thlen nasa, " an ti a; an department hna chu pisa chhung leh pawna thawh ngai a nih avangin hna hrang hrangte a nih tur anga an vil hneh loh ṭhin thu an tarlang.
Thu dawn danin, sanctioned post awm mek hi post siam a nih laia Mizoram hmun hrang hranga transformer enkawl tur zat ruahman aia tam tunah hian transformer a awm tawh. Chutih laiin, sanctioned post siam belh a nih loh bakah, post awm sa pawh hnawhkhah loh a tam avangin PE department-in harsatna an tâwk mek.
Power & Electricity department-ah hian provisional employee 1,330 leh muster roll 410 an awm mek bawk a; department hotute chuan, a nghet loa thawkte chu hnain a mamawh anga rawih an nih thu leh sanctioned post-a post ruak leh hnawhkhah nen a inkungkaih loh thu an sawi.