Kawlphethaa Mizoram mamawh leh harsatna PE Minister-in Union Minister hmaah a sawi

July 9, Thawhlehni khan Guwahati-ah India hmarchhak biala Power minister-te intawhkhawmna, North Eastern Region Power Minister Conference neih a ni a, Mizoram Power & Electricity minister F Rodingliana telin, Mizoramin kawlphethaa intodelh tura a mamawh leh harsatnate a sawi.

Mizoram PE minister F Rodingliana chuan, Mizoram sorkarin a ngaih pawimawh berte zingah kawlphethaa intodelh a tel thu sawiin, sorkar laipuiin small hydro power project (megawatt 24 hnuai lam) siamna atana financial assistance a pek ṭhin, kum 2017 hnua tihtawp tawh chu tharthawh leh turin Union Power Minister a ngen.

F Rodingliana chuan, hydel project tênau atana ṭanpuina pek tharthawh leh chungchang chu North East Region Power Committee meeting agenda-ah pawh a chhawp chhuah tawh thu a sawi a, "Hmarchhaka power minister-te chuan he policy tinung leh tura central cabinet pawmpuina hmuh thuai a nih theih nan hmalak tlân kan lo rel tawh a ni," a ti.

Mizoram chu India hmarchhak kil, tlang ram chhengchhe taka awm a nih avangin bungraw phurh man a to bik tih sawiin Rodingliana chuan, "Hei hian state dang ṭhenkhatte aiin scheme leh project-a hna thawhna man a tisang lo thei lo. He harsatna hi min hriatthiampui a, ngaihnathiamna min nei turin ka ngen che u a ni," a ti a; Mizorama kawlphetha siam chhuah leh sem darhna hmun, khawl leh hmanruate thawm ṭhatna tur mamawh tam zawk sorkar laipuiah thlen a tum thu sawiin, lo tihhlawhtlinsak turin sorkar laipui hotute a ngen.

Mizoram PE Minister chuan, sorkar laipui ṭanpuina tel lo chuan Mizoram leh hmarchhak state dangte tan hydel project thar sual chhuah a harsat thu a sawi a; Small Hydro Power Incentive scheme thar duan tawh, Central Cabinet pawmpui la ngai chu an ṭhutkhawm leh hmasak bera pawm a nih theih nana hma la turin Union Power Minister a ngen bawk.

Ṭhutkhawm kaihruaitu Union Power minister Manohar Lal Khattar chuan, India-in kum 2030 hmain renewable energy gigawatt 500 (megawatt 5,00,000) siam chhuah hman a tum avangin hmarchhak state-te hydro power tam tak siam chhuak thei a nihna hman ṭangkai a ṭul thu a sawi.

Manohar Lal Khattar chuan, sorkar laipui scheme kalpui mek - North Eastern Region Power System Improvement Project (NERPSIP) leh Revamped Distribution Sector Scheme (RDSS) hnathawh mekte a hun taka zo tur leh Aggregate Technical & Commercial (ATC) loss tam lutuk tihtlem nan Smart Metering Project kalpui thuai turin hmarchhak state-a power minister-te a chah.

NE Power Minister Conference-ah hian Mizoram, Assam, Nagaland, Tripura, Manipur, Sikkim leh Meghalaya aṭangin power minister leh secretary te, Ministry of Power official-te leh kawlphetha lam khawihtu public sector undertaking aiawhte an tel. Mizoram PE Minister hi PE secretary H Lalengmawia leh chief engineer JH Malsawma ten an ṭawiawm a ni.