ASF vanga 2024-a vawk thi tawh hlut zawng cheng nuai 2,008.05

Vawk pùl hri, African Swine Fever (ASF) vanga kumin 2024 chhunga Mizoram puma vawk thi leh suat belhkhawm chu 15,361 a ni a, a hlutna cheng nuai 2,008.05 vela chhût a nih thu AH & Vety department chuan an tarlang.

AH&Vety department chuan nimin khan YMA, Champhai Kahrawt Branch Hall-ah ASF Awareness Campaign cum Training of Farmers an buatsaih. Kumin January 1 aṭanga July 9 thlenga AH&Vety department-in report a dawn chinah Mizoramah ASF vangin vawk 5,321 a thi a, vawk 10,040 suat a ni bawk a, vawk thi leh suat hlutna chu belhkhawm chu Rs 20,08,05,321 vela chhût a nih thu tarlan a ni.

Champhaia Vety officer Dr Lalbiakzuala Sailo chuan, ASF a darh zel loh nan sorkar leh mipui ṭanrual a ṭul thu a sawi a; vawk vulhtute chu vawk thi a awmin a rang thei ang bera AH&Vety hotute hrilh tur leh, mi pakhat fimkhur loh rah khawtlangin an tuar thei tih hre reng turin a chah.

ASF Awareness Campaign-ah hian Champhai District Veterinary Hospital-a Vety officer Dr PL Lalruatfela'n ASF chungchang a sawifiah a ni.