MPCC-in CBI-te consent pek ṭhat an phût

Mizoram Pradesh Congress Committee (MPCC) hruaitute chuan nimin khan chief minister Lalduhoma hnenah, inthlan hmaa a intiam anga Central Bureau of Investigation (CBI) hnenah Mizoramah hnuchhui an kalpui theih nan general consent pe ṭha tura phûtna an thehlut a, CM aiawhin a private secretary Lalrinawma Khiangte-in a dawng.

Chief Minister hnena lehkha an thehluh zawhah MPCC hruaitute chuan Aizawl Press Club-ah thuthar thehdarhtute an kâwm a; MPCC senior vice president Lalnunmawia Chuaungo chuan, CM-in Mizoramah eirûkna a nasat thu leh chumi dona tura CBI an koh luh tur thu vawi duailo a lo sawi nia sawiin, "December 14, 2023 khan Assembly House-ah pawh phalna dil ngai loa CBI general consent an pek dawn thu a sawi," a ti.

Lalnunmawia Chuaungo chuan, Decembe 28, 2023 khan gazette notification chhuahin CBI hnenah general consent pek a nih thu sawiin, "Central leh state sorkar hnathawkte thliar loin general consent pek a ni," a ti a; CBI hnena general consent pek chu December 14, 2023-a Assembly House-a CM thusawi nen a inmil thlap thu a sawi.

CBI Director-in state hrang hrang chief secretary-te hnena generic draft consent notification a thawn chu Mizoram sorkarin a ngai ngaia hmangin July 1, 2024-ah Mizoram Gazette thar a tihchhuah thu sawiin Lalnunmawia chuan, "December 28, 2023-a notification chu awmze nei loah an rawn siam leh ta si. Hetianga hun rei lo te chhunga ZPM sorkarin thu an rawn zûk leh tâk chungchangah hian chhan pahnih chauh awm theiin kan hria," a ti.