PUC-in an zirlai ti ṭhate chawimawi

Pachhunga University College chuan nimin khan an Multipurpose Auditorium-ah an zirlai ti ṭhate chawimawina leh PUC-a lut tharte lawmna an buatsaih a, Higher & Technical Education (HTE) minister Dr Vanlalthlana leh MLA JeJe Lalpekhlua ten an hmanpui.

Dr Vanlalthlana chuan, zirlaite chu tih tak takna leh dawhtheihna nen zir tura chahin, "Khawvel hmasawn dan ang zelin intuai hriam ang che u. Company lian leh ropui tak takte pawh khawvel hmasawnnain a ken tel anga an in update loh avangin an tlachhe tawh a, hetiang chiah hian keini pawh khawvel hmasawnna mil zelin a ṭha lamah kan in update ve zel a pawimawh," a ti a; classroom chhung leh pawnah hmasawnna tur zawng zel turin a chah.

PUC principal Prof. H Lalthanzara chuan, zirlai lut tharte chu PUC-a an kal chhungin college-in a pek theih thiamna te, library-te leh thil hrang hrangte hmang ṭangkai turin a chah a; zirlai chhuak turte a lawmpui thu sawiin, an kal zelna turah duhsakna a hlan a ni.

Inkhawmah hian MZU undergraduate examination 2024-a department tina top 10-a tlingte hnenah chawimawina hlan a ni a; stream tina ti ṭha berte hnenah Proficiency Award hlan a ni bawk.