LADC deputy chairman thar thlang; 'Dan kalhin thlan a ni' - ZPM MDC

Nimin khan Lai Autonomous District Council (LADC) LADC Session Hall-ah emergency session neih a ni a, LADC deputy chairman thar tur thlan a ni. ZPM MDC-te chuan deputy chairman thlan dan chu dan kalh niin an sawi.

LADC deputy chairman C Lianzuala'n bànna a thehluh avangin deputy chairman thar thlan a ni a, chuhtu awm loin Tuithumhnar bialtu MDC H Lalmuansanga thlan a ni. C Lianzuala hi tun hnaia MDC dang pariat nena ZPM zawmtu zingah a tel avangin MNF leh Congress ṭangkawp sorkar siamah deputy chairman aṭangin a bâng.

ZPM MDC-te chuan, deputy chairman thlan a nih dan chu dan kalh niin an ngai a, chuvang chuan deputy chairman thlan a nih dawnah session hall an chhuahsan.

ZPM MDC-te chuan an party pisaah thuthar thehdarhtute an kâwm nghal a; an leader K Hre Kung chuan, deputy chairman thlang turin hriattirna chhuah leh thlan hun inkarah ni hnih tal a tla tur a ni tih dan a awm thu a sawi a, "Hmanhmawh leh chawpchilh takin, lehkha pawh eptu member-te'n kan hmuh kim hmain thlan a ni," a ti.

K Hre Kung chuan, deputy chairman thlan dan chu dan palzûtnaah an ngaih avangin session hall an chhuahsan tih sawiin, "Eptu lam hruaitu ka nih angin niminah pawh Chairman hnenah deputy chairman thlan hun chu dan bawhchhe lo zawnga kalpui turin ka lo ngen tawh," a ti a, a thurâwn zâwm loin dan an bawhchhiat thu a sawi a ni.