KHAWTHLIR

LMV chin kal thei

July 9, Thawhlehni tlai dar 4 vela Sihhmui leh Lengpui inkara kawngpui min chu nimin khan thawm ṭhat a ni a, chhun dar 12:30-ah lirthei ke li nei LMV kal theiha siam a ni a, MMV leh HMV tan kal tlang theih a ni lo.

MRB branch 105-na

Mizoram Rural Bank, Luangmual Branch chu nimin khan chief secretary Dr Renu Sharma-i'n a hawng a; MRB branch 105-na a ni. Dr Renu Sharma chuan, September 27, 1983-a din MRB-in kum 40 chhunga branch 105 a nei thei chu ropui a tih thu sawiin, Luangmual Branch thar chu mipuiin an chhawr ṭangkai ngei a beisei thu a sawi.

DC tharin kâwm

Kolasib bawrhsap thar Robert C Lalhmangaiha chuan nimin khan a pisaah MJA, Kolasib District hruaitute leh Kolasib IPRO-te a kâwm a, an thawhhona ṭhat a pawimawh thu a sawi. MJA hruaitute'n an ngaih pawimawh - kawngpui ṭha leh bawlhhlawh sâwngbâwl dan felfai zawk neih chungchangte an sawipui nghal a ni.

MHIP jubilee lawm

MHIP, Republic Veng Branch chuan nimin khan Republic Veng community hall-ah kum 50 an tlin an lawm a, bialtu MLA C Lalsawivunga, minister-in hmanpuiin, jubilee lungphun a hawng. He hunah hian Book of the Year 2023 ziaktu Ahmangaihi Khiangte leh Miss Mizoram 2024 Jennifer Lalrinzuali Renthlei te, hruaitu hlui leh ṭang laite chawi-mawina hun hman a ni.

Awareness campaign

Lunglei District Transport Office leh Traffic Police-te chuan nimin khan Saikuti Hall-ah Healthy Lunglei District Campaign pualin taxi leh two wheeler taxi khalhtute tan traffic rules leh non-communicable diseases chungchang inzirtirna an buatsaih. Taxi khalhtu mi 150 vel an tel a, traffic dan leh natna inkai chhâwn theih loh chi chungchang an zirtir a, Civil Hospital, Lungleia thawktute'n an hriselna dinhmun an enfiah bawk.

Dan thar inzirtir

Champhaia DC office, District Civil Supply office leh Consumer Union-te chuan nimin khan Champhai College multipurpose hall-ah college zirlaite pualin awareness programme an buatsaih. July 1, 2024-a hman ṭan criminal law thar pathum zirho a ni.