MP-te model village-a hmalak dan thlir

Lok Sabha MP Richard Vanlalhmangaiha leh Rajya Sabha MP K Vanlalvena te hoin nimin khan Aizawl DRDO office-ah Aizawl District Level Committee on Sansad Adarsh Gram Yojana (SAGY) Phase-IV (Muallungthu) & Phase-V (Ratu) an ṭhukhawm a; MP-te model village tana Village Development Plan bawhzui dan sawiho a ni.

Sorkar thuchhuah tarlan danin, Rajya Sabha MP K Vanlalvena'n Sansad Adarsh Gram Yojana (SAGY) Phase-V hnuaia model village atana a thlan zingah Ratu a tel a; Muallungthu chu Lok Sabha MP hmasa C Lalrosanga'n SAGY Phase-IV hnuaia model village atana a thlan zinga mi a ni thung.

Ratu Village Development Plan hnuaiah department 10 chuang thawh tur hna hrang hrang 32 dah a ni a, hna 18 zawh a ni tawh. Muallungthu Village Development Plan hnuaiah hna thawh tur chi hrang 50 chuang siam a ni a, chu'ng zinga 71% chu zawh tawh a ni.

Ṭhutkhawmah hian MP-te chuan hnathawh hmabak la awmte a rang lama bawhzui turin department aiawhte an chah a; hna thawh zawh tawh a nih chuan report pek vat ṭhin a pawimawh thu an sawi.

SAGY hmalakna hnuaiah hian MP-te'n model village atan an duh khua an thlang a, model village-ah chuan khawtlang mamawh leh ṭulte sawihoin Village Development Plan duan ṭhin a ni a, Plan tihlawhtling turin line department hrang hrangte thawhhona hnuaiah hmalak a ni.