Green-Ag cum GLIP hmalakna thlirho

Agriculture minister PC Vanlalruata hoin nimin khan a pisaah Global Environment Facility kaltlanga Green-Ag cum Green Landscape Information Platform (GLIP) hnuaia hmalakna thlirho a ni a; Lunglei leh Mamit district-a khaw 38-a hna thawhna tur hmanrua sem nghal a ni.

Minister PC Vanlalruata chuan, Green-Ag kalpuina state zingah hmahruaitu nih tum zel turin thawktute a chah a, "Kut hnathawktute tihmasawn tura thawktu in ni tih hre reng u la, neitu nihna thinlung pu chungin rinawm takin hna thawk ang che u," a ti a; Green-Ag thil tumte hlawhtling taka kalpui a nih theih nan uluk zawkin Agriculture department-a thawktute'n an vilpui dawn thu a sawi.

Ṭhutkhawma tarlan danin, Green-Ag hi Sustainable Development Goals leh Food & Agriculture Organisation thil tum ṭhenkhat tihlawhtling tura hmalakna a ni a, Mizoramah chuan Lunglei leh Mamit district-a khaw 38-ah kalpui mek niin, kum 2027 thleng awh tura ruahman a ni.

Green-Ag kaltlang hian kut hnathawktute'n ramngaw tichereu lo zawnga eizawnna ngêlnghet an neih theih nan ruahmanna hrang hrang siam a ni a; Farmer Field School kaltlangin loneitute leh ran vulhtute chu thil pawimawh zirtir ṭhin an nih bakah, village implementation committee dinin khaw hrang hrangin an mamawh milin ruahmanna siam ṭhin a ni.