UG gold medalist-te chawimawina hlân

MZP chuan July 9, Thawhlehni zan khan Ignite Studio-ah Mizoram University-in under graduate examination 2024 result a tih chhuaha gold medalist-te lawmpuina hun an buatsaih a, minister PC Vanlalruata'n a hmanpui. Gold medalist-te hi stream pali - arts, science, commerce leh home science-a pakhatna ṭheuh an ni.

PC Vanlalruata chuan, central service-a Mizote dinhmun thlirin a lungawithlâk loh thu a sawi a, "Kan hnam tan a lungngaihthlak. Zirna kan ngaihsan viau rualin, top level-ah duhthu kan sâm lo. Nationalism-ah kan chian a ṭul a, state danga kan tribal-puite central service-ah kan tluk lo hi ṭhangtharte'n ṭan lak nan hmang se ka duh," a ti a; social media hmang thiam tur leh tih tak zeta zirna lam luhchilh turin zirlaite a chah.

MZP aiawha thu sawitu C Lalremruata, vice president chuan, Right to Education hnuaia sorkarin zirlaite hnena zirlaibu a sem ṭhin chu zirlai tam takin an la dawng lo niin a sawi a; lehkhabu la dawng kim lo sikul 700 chuang awm tih sawiin, a rang lama hma la turin thuneitute a ngen. Zirlaibu chhutu Mizoram Government Press chu sorkarin enfiah se an duh thu a sawi bawk.

Inkhawmah hian MZU UG exam-a gold medalist mi palite hnenah chawimawina atan hùnmawi (memento) leh Rs 5,000 hlan a ni a; adviser to CM Lalmuanpuia Punte, MLA pawhin thu a sawi a ni.