Lunglei HPC VP-in sikul a tlawh

Lunglei District High Powered Committee (HPC) vice chairman V Malsawmtluanga, MLA chuan nimin khan Lunglei Electric Venga JNM Model Middle School a tlawh a, an dinhmun tlangpui a en.

HPC Vice Chairman chuan, sorkar sikulte chu sorkarin mi rethei leh harsa zawkte a puih theihna pawimawh a nih avangin tihchangtlun a pawimawh thu a sawi a, "Sorkar sikula zirna tihhmasawn kawngah zirtirtute an pawimawh a, sorkar hnuaia zirtirtute'n theihtawp an chhuah a ṭul," a ti.

JNM Model Middle School chu Lungleia sorkar sikul entawn tlak ber pawl a nih thu sawiin V Malsawmtluanga chuan, a ngaihhlutzia lantir nan HPC Fund aṭangin an sikul building zauha thawm ṭhat tum a nih thu a sawi.

JNM Model Middle School hi January 16, 1969-ah din a ni a, kum 1979-ah govt aided niin, 1985-ah deficit a ni leh a, September 1, 2003-ah sorkar sikulah hlankai (provincialised) a ni. Zirlai 137 an awm mek a, Lunglei district-a sorkar middle school zinga zirlai ngah ber a ni.