Motor parking nei lo office 49 a awm Kawng sirah workshop hnawk zual 42

Traffic police-te chuan Aizawl khawpuia sorkar leh corporate office 49-in lirthei hûnna tur, motor parking an nei lo a, parking nei ṭha tâwk chu office pakua chiah an nih thu an sawi. Aizawl khawpui chhung kawngpui tlangdung (main road) kamah lirthei chhe siamna (workshop) hnawk zual 42 a awm tih an sawi bawk.

Vanglaini palai zawhna chhangin, Traffic SP Lallian­mawia chuan, traffic police-te'n Aizawla sorkar office leh bank-te an enfiah tawhah, office pakua chuan thawktute lirthei leh anmahni dàwrtute lirthei hûnna tur an nei ṭha tawk tih a sawi a; parking nei, mahse thawktute lirthei zawng zawng pawh leng si lo office 24 leh parking nei lo hrim hrim office 49 an awm thu a sawi a ni.
Lallianmawia chuan, Ai­zawl­­ah traffic jam tizualtu motor park-na eng emaw zat a awm thu sawiin, "Chung par­king-te chu titawp turin AMC-ah kan ngen tawh a ni," a ti.
Traffic SP sawi danin, Aizawl khawpui tlangdung kawngpui (main road) sira workshop hnawk zuala ngaih 42-te chu tihtawp a nih theih nan Aizawl Municipal Council (AMC)-ah an thlen tawh. Kawngpui sira dawr tê (hawker) pawh hmun parukah hnawk zual a awm a, chungte pawh chu titawp turin AMC-ah an thlen a ni.
Telephone ban hnawk zual 38 awmin, sawn turin thuneitute hnenah an thlen tawh ṭhin a, mahse tun thleng hmalakna a la awm lo. Electric ban hnawk zual 27 a awm bawk a; chungte chu traffic hotute chuan sawn turin ziakin Power & Electricity engineer-in-chief ah an thlen tawh ṭhin a, mahse tun thlengin hma an la la lo bawk.
Aizawl khawpui kawngpuite an enfiahnaah, hmun 15-ah kawngpui leh kâwn zauh theih a awma an ngaih thu sawiin, Lallianmawia chuan, "Chungte chu a ṭul anga hmalak a nih theih nan PWD E-in-C ah ziakin kan thlen tawh a ni," a ti.
Traffic SP chuan, ke-a kalte an ngaih pawimawh thu sawiin, footpath leh flyover siam theihna tura an ngaihte chu thuneitute hnenah an thlen tawh tih a sawi a, "Kea kalte himna hi chenna tlak khawpui a ni a, ram changkang zawkte'n 'Walkable city is liveable city' an tih hi Aizawlah a awm ve theih nan hma kan la dawn a ni," a ti a; chutiang tur chuan Mizoram Architech Forum nen thawkhoin ruahmanna an siam thu a sawi.
Kum 2015-ah chuan traffic police-te chu driving licence nei loa lirthei khalhte leh rûi chunga lirthei khalh lakah an khauh dawn tih Traffic SP chuan a sawi a; two wheeler-te'n double/triple overtake an chíng tih sawiin, chutiang chu a reh theih nan khauh taka hma an lak tur thu a sawi bawk.