Mipuiin MPC sorkartir an mamawh - MPC president

MPC president Lalhmangaiha Sailo chuan, Congress party chu India ram hmun hrang hrangah an tlahniam mek niin a sawi a, "Mizoram mipuite hian MPC party sorkartir leh hi an mamawh a ni," a ti.

Nimina MPC office, kumina atana hawnna inkhawmah thu sawiin, Lalhmangaiha Sailo chuan, sorkar laipui leh state hrang hrangah Congress party an tlahniam zel niin a sawi a, "Tun hmaa Congress party kulhpui ni ṭhin Maharsatra, Haryana, Jharkhand leh Jammu & Kashmir state-ahte pawh an tla ta zel a ni," a ti.

MPC president chuan, Mizoram sorkar chu Mizoram leh Assam nena ramria buainaa hma la ngam lo-ah puhin, "A tawlh zawkah Mizoram sorkar chu a ṭang zel," a ti a; Chakma foreigner-te chungchangah pawh hma la duh loah puhin, YMA leh NGO dangte'n ṭhahnemngai taka an thawhte pawh sorkarin a bawhzui duh niin a sawi.

Lalhmangaiha Sailo chuan, Congress sorkar chu kawngpui leh lei (bridge) enkawl kawnga hlawhchham dêrah puhin, Mizoram hmun tinah kawngpui leh khawpui chhung kawngpuite a chhe em em vek niin a sawi a; "Food Security hmangin state dangte'n buhfai kg. khat Rs. 3-a an pek theih tawh laiin, Mizoramah chuan buhfai man Rs. 15-a tihsan a ni thung," a ti.

Lalhmangaiha Sailo chuan, Mizoram chhanchhuak turin mipuite'n MPC an sorkartir a ngaih thu sawiin, MPC chuan ram leh hnam enkawlna kawnga kal tum dan (political ideology) mumal tak a nei tih a sawi a, "Ram intodelhna leh eizawnnna kawnga hruai tum dan economic policy leh programme mumal tak kan nei a, nun dan ṭha inzirtirna leh tihmasawnna social reform kawnga mipui hruai dan tur duan sa fel tak kan nei a ni," a ti.