Hmun hniha lirthei chesualah mi pali an thi

January 12, Thawhṭanni zan khan Aizawl district-a hmun pahnihah lirtheia chetsualna a thleng a, mi pali an thi.

Thawhṭanni zan dar 8 vel khan Bawngkawn aṭanga Zemabawk lam pan Alto car MZ-01 K-9701, mipa kum tling lo khalh chuan Pushpak mandir chhakah scooty MZ-01 K-3200, Lalchhanchhuaha (20) s/o Lalrammawia, Zemabawk North khalh a sû a, scooty hi truck ding lai hnuaiah hnawl lûtin, a khalhtu Lalchhanchhuaha a thi. Scooty hnunga chuang Lalawmpuia erawh a na lutuk lo. Car khalhtu hi Juvenile Court-ah a chungchang ngaihtuah a ni ang.

Thawhṭanni zan vek, dar 12 vel khan Thenzawl leh Sialsuk inkarah Saiha leh Karimganj inkar tlan ṭhin maxicab AS-01 C-3061, Saiha lam aṭanga tlan chu Sialsuk thlen hma km. 10 velah chesualin, kawng thlangah a lum a; a khalhtu Tai Uddin Nahorani, Suapar Das leh Kuton Das, Karimganj district vekte chu a hmunah an thi.

Motor-ah hian mi 11 an chuang a, mi pariat hliamin, Sialsuk damdawi-inah lak an ni a, pathum chu an nat deuh avangin Aizawl panpui leh an ni.