Bawnghnute aṭanga siam chhuahah intodelh tum

NLUP hmalakna hnuaia MULCO, Ṭhuampuia In­digeneous Milk Product Plant bun mek chu nimin khan AH&Vety minister C Ngunlianchunga'n a tlawh a; minister chuan, bawng­hnute aṭanga thil siam chhuah hrang hrangah in­todelh tum a nih thu a sawi.

C Ngunlianchunga chuan, NLUP vanga bawng­­hnute thar chhuah pung zelah bawnghnute sawngbawlna hmun lian leh changkang zawk din a ṭul a, Indigeneous Milk Product Plant bun a nih thu sawiin, "Tunah hian MULCO-in bawnghnute an lak ṭhin 20%-a an titlem chung pawhin a tihralna lamah harsatna a awm a ni. He khawl hi peihfel a nih hun chuan tuna bawnghnute an lei lêt an lei thei ang," a ti.

Indigeneous Milk Product Plant hmangin bawnghnute chu mihring hriselna atana ṭha turin sawngbawl a nih tur thu sawiin Vety minister chuan, "Thingpuia pawlh turin bawnghnute dip pawh state pawn aṭanga la lut loin intodelh kan tum a ni," a ti a; an khawl bun mek chu hman ṭan a nih hunah kawng dangin hma an lak zel tur thu a sawi.

Indigeneous Milk Product Plant hi cheng nuai 350 sênga bun tur niin, February 2015-ah zawh theih beisei a ni. Hman a nih hunah chuan paneer, dahi, lassi, flavoured milk, ghee, butter, cheese, adt. siam chhuah a ni ang.

Vanglaini palai zawh­na chhangin MULCO ho­tute chuan, ni khatah bawnghnute litre 6,500 vel an mamawh tih an sawi a, "NLUP bawng sem leh a nih hnuah bawnghnute a pung a, kan lak ṭhin 20% vela kan tihniam chung pawhin ni khatah litre 8,000 dawn lak a ngai ṭhin. A hralhna lamah harsatna kan tawk lek lek a ni," an ti.

MULCO hnuaiah hian society 37 an awm mek a, producer member 850 awmin, chung zinga 450-te chuan MULCO-ah bawnghnute an chhûng mek a ni.