Veng cheitute hnenah lawmpuina hlan

Krismas leh kum thar vuakvêta khawlai cheitu veng hrang hrangte hnenah nimin khan Central YMA hall-ah Home minister R Lalzirliana'n lawmpuina thuziak, Certificate of Appreciation a hlan a; hunpui a lo thlen leh hunah chuan Isua zia lanna lam tarlan tam theih ni se a duh thu a sawi.

Home Minister chuan, Mizote'n kawng hrang hrangin hma kan sawn chho zel tih sawiin, "Tunah chuan veng cheina hmuna zu rûi buai leh buaina siama insual an awm tlem tawh a, zu in chu an awm, mahse mi pawi sawi hlau takin an awm tawh. Krismas leh kum thar kan hman dan pawh a fîm sâwt hle a ni," a ti.

Veng chei endikna hi category A, B leh C-ahte ṭhen a ni a; category A-ah Bethlehem Veng, Armed Veng, Chanmari, Saikhamakawn, Kulikawn, Khatla, Bungkawn, Bawngkawn South, Chaltlang leh Ramhlun North-te an awm a, Rs. 10,000 ṭheuh an dawng.

Category B-ah Bethlehem Vengthlang, Chhinga Veng, ITI Veng, Zarkawt, College Veng, Bawngkawn, Leitan, Tuikhuah­tlang, Thakthing, Mission Veng (YMA) South, Hlimen, Chawnpui leh Dinthar-te niin Rs. 7,000 ṭheuh an dawng a; Category C-ah Electric Veng, Salem, Maubawk, Vaivakawn, Luangmual (Chhangurkawn), Sakawrtui­chhun, Zotlang, Melthum, Mission Vengthlang, Mission Veng (YMA) North, Venghlui, Sihphir Arpu Veng, Sihphir Venghlun, Durtlang Mualveng leh Saron Vengte awmin, Rs. 5,000 ṭheuh an dawng a ni.

Armed Veng, Kulikawn, Mission Vengthlang, Khatla leh Bethlehem Vengte chu intihhlimna hun an buatsaih avangin Rs. 16,000 ṭheuh pek an ni bawk.