India-a hockey champion lawmpui

School Education department chuan nimin khan directorate conference hall-ah 60th National School Games-a champion, Mizoram hmeichhe hockey team-te lawmpuina hun an buatsaih a, School Education minister H Rohluna leh parliamentary secretary Joseph Lalhimpuia ten an hmanpui.

Lawmpuina inkhawm hi School Education director H Lallengmawia'n a kaihruai a; minister H Rohluna chuan, "Sorkarin infiammite tan khawvel thar a siam mek avangin hlawhtlinna nasa tak Mizoramin a hmu mek a ni. Sorkarin khelmual ṭha bakah infiammite mamawh tinreng a chhawpchhuak mek a, ṭhalaite'n an chhan let vena tur chu insûm­theihna leh taimâkna nena an thiam bik in­fiamnate lo tihhmasawn a, an talent-te lo peipun ve hi a ni," a ti.

Joseph Lalhimpuia pawhin thu sawiin, National School Games-a Mizo infiammite'n hlawhtlinna an chan chhan chu sorkarin infiammite tana khawvel thar a siamsak vang a nih thu a sawi.

School Education Minister hian Mizoram hockey team member 15-te hnenah School Education Incentive Cash Award Rs. 5,000 ṭheuh leh coach leh manager hnenah Rs. 2,000 ve ve a hlan a ni.